Четворицата обвинети во случајот „Трезор“ со првостепената пресуда беа осудени на повеќегодишни затворски казни, од кои највисоката од 15 години му беше изречена на Горан Грујевски, Мијалков доби осум години, додека Стајковиќ и Јакимовски по пет. Со одлуката на Апелација се укинуваат и затворските казни и предметот се враќа на повторно судење
Во кусото образложение на одлуката за случајот „Трезор“, кој се однесуваше за начинот на набавката на британска опрема за следење на комуникациите, се вели дека пресудата се укинува затоа што Апелација констатирала дека првостепениот суд сторил суштествени повреди на одредбите од Законот за кривична постапка
Апелацискиот суд Скопје ја укина првостепената пресуда за случајот „Трезор“ за начинот на набавката на британска опрема за следење на комуникациите за што поранешниот шеф на УБК, Сашо Мијалков и ексфункционерите на Управата и на МВР, Горан Грујевски, Небојша Стајковиќ и Тони Јакимовски добија повеќегодишни затворски казни од страна на Кривичниот суд во Скопје.
Како што се наведува во соопштението од Апелација, предметот се враќа пред Основниот кривичен суд Скопје на повторно судење.
„Апелациониот суд Скопје известува дека, постапувајќи по кривичниот предмет КОКЖ-100/21, во јавноста познат како ‘Трезор’ , по одржана јавна седница, донесе решение со кое ги уважи жалбите на обвинетите С.М. од С., Г.Г. од С., Н.С. од С. и Т.Ј. од С., изјавени преку нивните бранители, со што ја укина првостепената пресуда и предметот го врати пред Основниот кривичен суд Скопје на повторно постапување и одлучување“,
стои во соопштението.
Во кусото образложение на одлуката се вели дека пресудата се укинува затоа што Апелација констатирала дека првостепениот суд сторил суштествени повреди на одредбите од Законот за кривична постапка.
„Апелациониот суд Скопје при разгледување на побиената пресуда констатираше дека првостепениот суд при постапувањето по овој предмет сторил суштествени повреди на одредбите од Законот за кривичната постапка, со што се доведува во прашање фактичката состојба и правилната примена на Кривичниот законик“,
се наведува во соопштението.
Случајот „Трезор“ беше отворен од поранешното Специјално обвинителство. По судскиот процес, лани на 13 април Кривичниот суд ја донесе пресудата, со која четворицата обвинети ги прогласи за виновни и им изрече повеќегодишни затворски казни.
По изрекувањето на пресудата за Мијалков, судот му одреди и мерка притвор поради опасност од бегство. Тој излезе од притвор осум месеци подоцна откако Апелациониот суд ја прифати гаранцијата од 11 106 501 евро и му одредија мерки за претпазливост, односно му го одзедоа пасошот и му наложија обврска да се јавува во судот.
Највисока казна од 15 години затвор доби поранешниот началник на Петтата Управа на сега веќе поранешната Управа за безбедност и контраразузнавање, Горан Грујевски. Тогашниот директор на УБК, Сашо Мијалков доби осум години, а поранешниот помошник-министер во МВР, Небојша Стајковиќ и ексначалникот на оддел во УБК Тони Јакимовски добија по пет години затворски казни.
Предметот „Трезор“ се однесуваше на начинот на набавка на британска опрема за следење на комуникациите. Го отвори СЈО, а потоа, исто како и другите предмети, премина во рацете на редовните обвинителства, но обвинителите, со овластување од Љубомир Јовески, останаа исти. Артан Ајро и Трајче Пеливанов го застапуваа предметот во текот на судскиот процес и според нивните тврдења било договорено опремата наместо директно од британската компанија „Гама интернешнл“ да се набави преку фирма посредник од Скопје. Стануваше збор за фирмата „Финзи“ која, како што тогаш потенцираа обвинителите, била основана од офшор-фирма во САД, а на која како краен сопственик се јавува бизнисменот Орце Камчев. Прв управител на скопската фирма бил регистриран братот на обвинетиот помошник-министер во МВР, Небојша Стајковиќ, а потоа управител бил починатиот Коста Крпач. Оваа фирма, поради сомнителниот капитал и потекло, е дел и од истрагата „Империја“ каде што се осомничени и Сашо Мијалков и Орце Камчев.
Оваа фирма потпишала договор со „Гама интернешнл“ за да биде ексклузивен дистрибутер на опремата во Македонија, но според обвинителството индикативно е што тоа се случило уште пред да се почне постапката за набавка.
Штета што била направена на буџетот, а со тоа и имотната корист што ја добила „Финзи“, според обвинението, беше проценета на околу 48,5 милиони денари.
Од друга страна, пак, одбраната настапуваше со теза дека, со оглед дека постоел договор помеѓу скопската и британската фирма, немало друг начин да се набави опремата. Мијалков, тврдеа неговите адвокати, нема никаква врска со „Финзи“ ниту, пак, влијаел некако за потпишување на таков договор.
Дека не постоела однапред договорена зделка, одбраната во своите завршни зборови се повикуваше и на одговорите што ги добила од обвинителството на британските служби преку меѓународна правна помош. Добиените одговори, потенцираше одбраната, покажуваат дека нема докази оти Коста Крпач бил да договора нешто со „Гама“, како и дека во одговорите од Британците пишува дека вработените во британската фирма не се сеќавале дека имало средба. Одбраната потенцираше уште еден момент од одговорите од британските служби, а тоа е дека во досието на „Гама“ нема релевантни докази оти претставници на МВР имале некаква електронска комуникација во врска со набавката што се правела преку „Финзи“. За оваа околност, пак, обвинителите претходно посочија дека нема такви докази зашто „Гама“ ги чува само комуникациите за последните три години.
Инаку, поранешниот шеф на УБК има првостепена пресуда и во случајот „Таргет-Тврдина“ со која е осуден на 12 години затвор, обвинет е и во случаите „Плацови на Водно“ и „Титаник 2“, а осомничен е и во предметот „Империја“. Во „Тортура“, пак, доби ослободителна пресуда.