Пратеникот на Левица се повикува на собранискиот Деловник, посочувајќи дека претседателот ги свикува седниците и претседава со нив, додека потпретседателите може да го заменат според однапред утврден редослед
Собранието повторно е на пауза од еден час. Паузата ја одобри потпретседателот на Собранието Фадил Зендели, по барање на Димитар Апасиев, кој цитираше одредби од Деловникот според кои, како што толкува, спикерот Талат Џафери има обврска да ја води седницата.
Во процедурално обраќање, Апасиев го повика Џафери да се врати во салата и да продолжи да ја води седницата.
Тој се повика на членовите 60 и 61 од Деловникот на Собранието, посочувајќи дека претседателот ги свикува седниците и претседава со нив, додека потпретседателите може да го заменат во случај на спреченост или отсуство на спикерот од Собранието, според однапред утврден редослед при што ќе се води сметка за подеднакво вклучување на потпретседателите.
Наспроти досегашната пракса, Џафери да го заменува главно потпретседателот Горан Мисовски, спикерот овој пат го повика другиот потпретседател – Фадил Зендели од Беса да продолжи да ја води седницата на чиј дневен ред е прашањето за доверба на Владата. Џафери рече дека не ја поддржува иницијативата што ја поднесоа опозициските партии, засилени со Беса, и дека нема да остане во салата и да биде 61. пратеник, со што би имало кворум за гласање за донесување на дневниот ред.
Пратениците од коалицијата на СДСМ и од ДУИ не присуствуваат на денешната седница, односно не се појавија во салата, така што, со отсуството на Кастриот Реџепи од Беса, опозицијата нема кворум за работа и прашање е дали воопшто ќе се отвори дискусија за прашањето за доверба на Владата.