И од Левица, како и од ВМРО-ДПМНЕ најавија дека ова ќе им биде единственo излагање пред уставната комисија. Нивниот претседател Димитар Апасиев потенцира дека власта насила и безглаво влегла во процес на уставни измени, за кој однапред се знаело дека нема двотретинско мнозинство
Апасиев зборуваше и за правните последици кои ќе ги предизвикаат уставните измени нагласувајќи дека според него ќе биде тешко да се проголтаат бидејќи водат кон бугаризација на земјата
Ова ќе биде единственото излагање пред уставната комисија, рече претседателот на Левица, Димитар Апасиев, критикувајќи ја власта дека насила и безглаво влегла во процес на уставни измени, за кој однапред се знаело дека нема двотретинско мнозинство. За него, материјалната расправа е безвредна.
„Влеговте во процесот вртоглаво без да обезбедите двотретинско мнозинство. Вие, премиере, направивте сметка без крчмар. Сè ова што ние денес го зборуваме е обична козметика знаејќи дека влегуваме во еден лузерски процес бидејќи вие навикнавте и сакате и нас како македонска нација да нè навикнете на порази. Првото нешто беше францускиот предлог за бугаризација, спортски кажано – вие и Османи изгубивте 17:2 во овој процес. Независни германски експерти ви кажаа дека ова е чудо на бугарската дипломатија или како што велат во Бугарија, ‘смрт за македонизмот’, овој спој на неоглобализам и неоврховизам и тие велат ’полекичка и на рати’, применуваат врз вас салама тактика – не знам дали не гледате или се правите дека не гледате. Или ве сечкаат на парчиња или да се изразам на италијански, имаат една изрека ‘кокошка се куби пердув по пердув’ – дипломатски жаргонистички кажано, вие сте искубана кокошка во споредба со византиската-грчка дипломатија или бугарската дипломатија која ви направи хет-трик“,
рече тој.
Апасиев зборуваше и за правните последици кои ќе ги предизвикаат уставните измени нагласувајќи дека според него ќе биде тешко да се проголтаат бидејќи водат кон бугаризација на земјата.
Фото: „360 степени“
„Никој не говори за правните последици, не е само внесување на Бугарите. Ние имаме етнички концепт на држава, примитивен, тие етнички групи имаат колективни права…. Ќе се овозможи радио и телевизиска програма на бугарски јазик каде што ќе ви кажуваат дека Гоце Делчев е Бугарин и дека Илинденското востание е бугарско“,
рече Апасиев.
Нè учеа дека Устав се менува со рака која трепери, значи треба да се размисли, рече Апасиев.
„Голтавме за ФИРОМ, голтавме за Преспанскиот договор кога станавме северномакедонци, голтавме за двојазичноста… Колку пати треба да голтаме, имате ли кичма вие, имате ли национална гордост? Вие сте одродена политичка елита која е најголем крвник на македонскиот народ“,
рече Апасиев.
За време на говорот на Апасиев, претставниците на власта гласно негодуваа, а координаторот на пратеничката група на ВМРО-ДПМНЕ, Никола Мицевски, бараше од претседателот Талат Џафери да воведе ред за Апасиев да може да зборува велејќи дека пратениците од власта се коментатори.