Намалени плати, цензура, казни, необезбедена заштитна опрема, намалена транспарентност на институциите. Со ова се соочуваат дел од новинарите и медиумските работници во периодот на корона-кризата, што им влијае на менталното здравје
Финансиски, психолошки, социјални, но и етички и професионални проблеми, како намалени плати, цензура, казни, необезбедена заштитна опрема, намалена транспарентност на институциите. Со ова се соочуваат дел од новинарите и медиумските работници во периодот на корона-кризата, со што ситуацијата во голема мера им влијае на менталното здравје и им е потребна психолошка поддршка.
Ова се податоците добиени од анкетата што Синдикатот на новинари и медиумски работници (ССНМ) ја спроведе меѓу 150 припадници на фелата, при што заклучокот е дека пандемијата силно ја погоди медиумската индустрија на повеќе нивоа.
Кратење на платите и отпуштања
ССНМ оценува дека најголемиот страв на сите граѓани го делат и медиумските работници – губењето на изворот на егзистенција. Според истражувањето, четворица медиумски работници останале без работа во најголемиот врв на пандемијата, а 45 одговориле дека познаваат колеги што ја изгубиле работата.
„Загрижува фактот што дури 30 отсто од анкетираните одговориле дека познаваат некој што останал без работа за време на пандемијата на коронавирусот. Седумнаесет проценти од медиумските работници одговориле дека им била намалена платата. Помали плати пристигнале на трансакциските сметки кај дваесет и пет од анкетираните. На седуммина платата им била скратена за 30 проценти“,
открива истражувањето на ССНМ.
Најмногу кратење имало кај новинарите со полно работно време – 11 новинари. Четири слободни новинари се соочиле со кратење на приходите од 20% (1), 15% (1), 10% (2) Некаде, е забележано делумно намалување на платите . На пример, на петмина новинари со полно работно време, скратени им се 30% од примањата во овој период на криза. Половина од платата (50%) добил еден новинар, двајца по 20% намалување, двајца 10% помалку и на еден новинар му била скратена платата за 15%. Покуси за 20% и 30% од платата останале и двајца уредници. Еден фоторепортер добил плата скратена за 30%.
Во тој период, со кршење на работничките права, сопствениците своеволно одлучиле да не исплатат боледување на 37 од нашите испитаници, или на 24% од испитаниците.
Нетранспарентност, цензура
Најчестите одговори на испитаниците во врска проблемите со кои се соочиле во известувањето за здравствената криза е транспарентноста на институциите. Дваесет и пет проценти од испитаниците (37 лица) одговориле дека голем дел од прашањата до институциите останале неодговорени.
Дополнително, во обид да ги заштитат граѓаните од дезинформации, ја губат силата да се изборат во сопствениот „двор“.
Еден од новинарите го навел сопствениот пример дека поради интервју со градоначалникот на Куманово, Максим Димитриевски, бил казнет со 15 проценти од плата еден месец. Ова е одговор на новинар кој бил казнет на своето работно место поради сработеното. Како што наведуваат од Синдикатот, причините за оваа небулозна казна, за која речиси никој и не разбра, останаа непознати.
Заштита има, ама е недоволна
Двајца медиумски работници досега ја загубија битката со коронавирусот, десетици новинари и медиумски работници станаа позитивни на ковид-19, а дел беа праќани и во самоизолација поради контакт со заболени при извршување на своите работни задачи.
Ова, покрај стравот за економско-социјалната безбедност, го зголемува нивото на страв кај медиумските професионалци кои секојдневно при извршувањето на своите редовни работни задачи се ставаат во ризик од заразување, што според истражувањето на Синдикатот на новинари и медиумски работници е уште еден од главните проблеми со кои се соочуваат колегите.
Шеесет и осум медиумски работници преку ова истражување порачуваат дека им е потребна заштитна опрема. Дванаесет од новинарите вработени на полно работно време одговориле дека немале соодветна заштита.
На прашањето: „Дали вашиот работодавач ви обезбедил заштитна опрема“, 115 одговориле со „да“, а 33 (22 проценти) кажале дека сопствениците не им обезбедиле опрема со која ќе се заштитат на работа.
Од останатите проблеми со кои се соочуваат вработените во медиумскиот сектор се: малку луѓе во редакциите (64 испитаници одговориле дека работеле во канцеларија, 50 пријавиле дека работат од дома), многу работа, менување и дезинфекција на опремата, работа во групи, проблеми во комуникацијата и забавување на темпото на работа, пречки во онлајн-комуникацијата, а динамиката на работата била забавена и од техничките проблеми.
Од алатките за комуникација најексплоатирани се телефоните (83), е-пошта (20), 14 (Скајп/Зум), Вибер (11), Ватсап (4) и Сигнал (2) .
Влијанието врз менталното здравје и психолошка поддршка
Медиумските работници се жалат и на намалување на квалитетот на животот. Дури 62 отсто во истражувањето одговориле дека овој начин на работа им влијае врз менталното здравје.
„Три месеци работам втора смена до 23 часот навечер за да готвам, чувам деца и да учам со нив додека дојде сопругот. Новинарите се во макотрпна битка во вителот на лажните вести, се троши последниот атом енергија за да се дојде до точни и навремени информации“,
навела една од испитаните во објаснувањето на одговорите на анкетата.
Стравот и паниката се причина 48 од испитаните да се изјаснат дека им е потребна психолошка поддршка.
Новото темпо наметнато со ситуацијата со коронавирусот некаде предизвикало и пречки во комуникацијата меѓу самите вработени, поради што 16% сметаат дека е потребна поголема колегијалност, а 24 новинари констатирале дека им е потребна поддршка од уредниците.
Анкетата на Синдикатот на новинари и медиумски работници во Македонија е спроведена помеѓу 150 испитаници од фелата, кои одговарале на 23 прашања поврзани со ковид-19. Од нив, 108 се новинари (84 со полно работно време, 19 слободни новинари, 5 дописници), 14 се сниматели, 10 се уредници, 10 се монтажери, шест од режија и двајца фоторепортери.