Од Здружението апелираат институциите сериозно да пристапат кон овој проблем, да се консултираат со експерти и да најдат решение кое нема да вклучува смрт за мечките
Според министерот за земјоделство Љупчо Николовски, пак, ваквата новосоздадена состојба е уште една причина за што побрзо носење на законот за ловство и дивеч, кој е во собраниска процедура, а во кој, како што рече, е регулирано како да се постапува кога во урбани средини и други населени места се загрозени животот на луѓето и објектите
Отстрелот на дивите животни, особено на мечката која е витален дел од националните паркови, не смее да биде предлог за решавање на проблемот, реагираат од Здружението за заштита на животните „Анима мунди“ во врска со проблемот со кафеавите мечки кои, во недостаток на храна во Националниот парк „Маврово“, се симнуваат во населените места и предизвикуваат материјални штети на локалното население.
Од здружението апелираат институциите сериозно да пристапат кон овој проблем, да се консултираат со експерти и да најдат решение кое нема да вклучува смрт за мечките.
„Убиство на диви животни не смее и нема да биде предлог на маса за решавање на овој проблем наместо наметнување мерки на населението и комуналните служби, преземање дејствија за редовно чистење на отпад и прихранување на мечките. Обука на населението како да се заштити и превенира, коегзистира со дивите животни што е пракса во секоја цивилизирана држава со развиена свест. Кафеавата мечка е диво животно со највисока заштита во законот и предупредуваме дека така треба и да остане“,
се вели во реакцијата на „Анима мунди“.
Нагласуваат дека мечките како заштитен вид се важен дел од екосистемот, а оти се соочуваат со закана за отстрел од човекот кој, како што додаваат од „Анима мунди“, е егоцентричен вид кој е склон кон деструктивно дејствување.
„Поради очигледната неможност да се прехрани во своето природно живеалиште поради човечкото влијание и уништување на шумските предели, таа нашла лесен начин да дојде до храна кај човекот, кантите за отпадоци и дивите депонии. Грабежот на природните ресурси по планините ги симна мечките по селата!“,
додаваат од здружението.
По однос на зголеменото присуство на мечките во Маврово и Ростуше, денеска се огласи и министерот за земјоделство, шумарство и водостопанство Љупчо Николовски. Посочи дека без согласност на Министерството за животна средина не може да има отстрел, но кажа и дека државата мора да ја гарантира безбедноста на граѓаните.
Напомена дека прашањето е многу комплексно зашто мечката е заштитен вид во земјава.
„Во понеделник ќе има состанок за да се одлучи дали ќе ѝ се предложи на Владата прогласување кризна состојба. И утрово имавме состанок, ги разгледуваме сите механизми, но без согласност на Министерството за животна средина не може да има дозвола за отстрел, а од друга страна државните институции мора да ја гарантираат безбедноста на жителите во тие региони“,
рече Николовски.
Според министерот, ваквата новосоздадена состојба е уште една причина за што побрзо носење на законот за ловство и дивеч, кој е во собраниска процедура, а во кој, како што рече, е регулирано како да се постапува кога во урбани средини и други населени места се загрозени животот на луѓето и објектите.
Општина Маврово и Ростуше побараа Владата да прогласи кризна состојба на целата територија на општината поради зголемено присуство на мечките во населените места.