Директорот на ДЗС упати особен апел до сите граѓани, но и до земјоделците и сточарите, да не палат оган на отворено, да не ги палат своите стрништа ниту пак, сува трева, пасишта и грмушки. Повика граѓаните да ја почитуваат и забраната за движење низ шуми, која стапи во сила пред два дена, а ќе трае до крајот на август
Директорот на Дирекцијата за заштита и спасување (ДЗС), Стојанче Ангелов, предупреди дека сезоната на пожари годава започна порано и дека на дневно ниво во земјава се регистрираат по триесетина пожари на отворен простор. Само во јули, односно во овие три дена, како што рече, пријавени се 43 пожари на отворено.
Ангелов на денешната прес-конференција рече дека според прогнозите, најверојатно ни претстои многу тешко лето со многу пожари за гасење. Додаде дека фокусот треба да биде ставен на одбрана на населените места.
„Упатувам апел до поголемиот број граѓани кои имаат викендици или стари куќи во делумно или целосно напуштени села, да се погрижат за своите дворови. Во Валандовско постоеше опасност да изгорат неколку куќи во кои сè уште живеат возрасни луѓе кои го запуштиле дворот и им изникнала трева повисока од еден метар со што пожарот можеше да дојде до прагот на куќите и да ги запали. Апелирам граѓаните да ја искосат тревата и на тој начин ќе ни помогнат во гаснењето на пожарите бидејќи, со вакво темпо, и според прогнозите, најверојатно ќе имаме многу тешко лето со многу пожари за гаснење и нашиот фокус наместо кон гаснење на пожарите ќе треба да биде кон одбрана на населените места“,
рече Ангелов на денешната прес-конференција.
Особен апел Ангелов упати до сите граѓани, но и до земјоделците и сточарите, да не палат оган на отворено, да не ги палат своите стрништа ниту пак, сува трева, пасишта и грмушки. Повика граѓаните да ја почитуваат и забраната за движење низ шуми, која стапи во сила пред два дена, а ќе трае до крајот на август.
Директорот на ДЗС рече дека платата на вработените во авио-одделението во Дирекцијата е двојно зголемена што, како што оцени, ќе биде мотивирачки фактор да останат да работат во ДЗС. Воедно ги повика на разговор пилотите што имаат професионална дозвола за летање, а не се ангажирани, да дојдат на дообука и да се стекнат со дозвола за управување со „ертрактор“.
Двајцата пензионирани пилоти на „ертракторите“ од завчера повторно се на располагање на ДЗС откако потпишаа договор за ангажман со институцијата.