Андоновски изјави дека во идната влада веројатно нема да постојат прв и втор вицепремиер како досега и најави дека министерството кое го предводи вицепремиерот Артан Груби ќе биде само министерство за односи меѓу заедниците, а не и за политички систем, нагласувајќи дека во канцелариите повеќе нема да се практикува спорт
Преговорите за состав на новата влада се во тек и веќе е навлезено во дискусија за програмските и кадровските решенија, вели во интервју за Радио Слободна Европа секретарот за меѓународна соработка на ВМРО-ДПМНЕ Стефан Андоновски. Сепак, тој не открива детали за, како што вели, да останеме чесни кон нашите партнери од коалицијата, бидејќи и тие се чесни кон процесот.
Анодновски посочува дека се фокусирани и на обидот да постигнат поширок консензус за некои национални прашања и да стигнат до потребното двотретинско мнозинство од 80 пратеници за битни промени на законите.
„Тоа значи дека дискусии ќе има и со други политички партии или пак поедини пратеници во Собранието кои би биле заинтересирани за поединечни законски проекти. Во нив многу често ќе видите и реформи кои ги бара и ЕУ, а се двотретински закони. Тука зборувам и за правосудство и за организација на управата и за реформа на јавната администрација и многубројни други закони. Мислам дека е чесен пристапот да не барате пратеници кои ќе ве поддржуваат туку да барате пратеници кои ќе сакаат да се вградат во процесот и да дадат свои критики и забелешки и ако тие критики се легитимни и се прифатат тогаш ние би гласале и би го поддржале тој проект“
вели тој во интервјуто за РСЕ.
Андоновски изјави дека во идната влада веројатно нема да постојат прв и втор вицепремиер како досега и најави дека министерството кое го предводи вицепремиерот Артан Груби ќе биде само министерство за односи меѓу заедниците, а не и за политички систем, нагласувајќи дека во канцелариите повеќе нема да се практикува спорт.
„Треба да се праша за ова претседателот Христијан Мицкоски бидејќи како мандатар на идната Влада тој ги одлучува ресорите, но мислам дека нема да постојат прв и втор вицепремиер. Планираме една мала реконструкција во Министерството за политички систем и односи меѓу заедниците и мислам дека во оваа насока граѓаните ќе бидат навистина задоволни. Спорт во рамки на канцелариите нема да се практикува, постојат спортски сали за тоа. Вториот дел мене како правник ми пречи тоа што ова министерство се нарекуваше за политички систем кога знаеме дека се ова што ние го работиме е политички систем. И Собранието е политички систем, Владата, дури и судовите се политички систем. Тоа е таа поделба на власта кај нас која постои и е на три дела. Беше чудно што еден министер е задолжен за цел политички систем во државата односно за еден ресор. Така што мислам дека ова ќе се трансформира само во Министерство за односи меѓу заедниците додека политичкиот систем има една малку поширока димензија“,
рече Андоновски.
Според него, треба да има човек во влада кој ќе се грижи за политички систем, но тоа да има една поширока димензија, а не ресорски со сектори.