АМСМ: Непрооден е патот кон ХЕЦ „Козјак“ поради појава на голомразица

Сообраќајот на регионалниот пат Дебар – Маврово е нормализиран

Непрооден е патот кон ХЕЦ „Козјак“ поради појава на голомразица, информираат утрово од Автомото сојузот на Македонија (АМСМ).

Оттаму додаваат и дека сообраќајот на регионалниот пат Дебар – Маврово е нормализиран.

Поради заледени коловози, тешко проодни се неколку патни правци во западниот дел од државата – има пријави за заглавени возила

Како што соопштија од АМСМ, сообраќајот на државните патишта се одвива непречено, наместа по влажни коловози.

„Интензитетот на сообраќајот на патните правци надвор од градските среди е умерен. На граничните премини од македонска страна нема подолги задржувања за влез и излез од државата“,

се вели во соопштението.

Се препорачува приспособена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде што има можност од појава на одрони.

Ова особено важи за делниците Катланово – Велес, Маврово – Дебар – Струга, Виница – Берово и Кочани – Делчево.

Почитување на законската обврска за задолжително поседување на зимска опрема во возилата, без оглед на моментната временска состојба.