Американската јавност е сè покритична кон чекорите што ги презема претседателот Доналд Трамп кон Иран, покажува последната анкета спроведена помеѓу 6 и 7 јануари од „Ројтерс“ и „Ипсос“. Сепак, според анкетата, популарноста на Трамп останува стабилна, пренесува „Ал Џезира“.
Повеќето од анкетираните стравуваат дека во иднина би можела да избие војна меѓу двете земји откако по наредба на Трамп беше убиен иранскиот генерал Касим Сулејмани, што испровоцира возвратен удар од Иран.
Според анкетата на „Ројтерс“ и „Ипсос“, 53 отсто од повозрасните граѓани во САД не го одобруваат начинот на кој Трамп се однесува кон Иран. Ова е зголемување од девет отсто во споредба со слична анкета направена во средината на декември.
Одговорите во анкетите се јасно поделени во зависност од тоа кого поддржуваат анкетираните. Неодобрувањето изминативе месеци расте кај демократите и кај оние што гласаат за независни кандидати, додека кај прорепубликанците нема промени.
Девет од десет демократи и пет од десет неопределени не ги одобруваат постапките на Трамп, додека меѓу републиканците еден од десет е против, покажува анкетата.
Популарноста на Трамп останува стабилна
Од друга страна, еден од десет демократи, четири од десет неопределени и осум од десет републиканци го одобруваат односот на Трамп кон Иран.
Истражувањето покажува дека по растечките тензии меѓу САД и Иран популарноста на Трамп останува стабилна, со тоа што 42 отсто од анкетираните го одобруваат неговото постапување.
За потсетување, пред неполн месец, во пресрет на најавите за импичмент, рејтингот на Трамп достигна рекордно ниво искачувајќи се на 43 отсто поддршка на анкетите.
Страв од Иран
Друга анкета на „Ројтерс“ и „Ипсос“, која е спроведена помеѓу 3 и 6 јануари, открива дека 41 отсто од испитаниците гледаат на Иран како на непосредна закана за САД, што е 17 отсто повеќе во споредба со слична анкета спроведена во мај 2019 година.
Седумдесет и еден отсто од Американците стравуваат дека САД ќе влезат во војна со Иран во следните неколку години, што е пораст од 20 отсто во споредба со мајската анкета.