Не е јасно дали неговото отсуство значи дека Трамп ги намалил очекувањата на Вашингтон за состанокот во Лондон откако во неделата изјави дека се надева оти Москва и Киев ќе постигнат договор оваа недела за прекин на конфликтот во Украина
Американскиот државен секретар Марко Рубио нема да учествува на разговорите во Лондон, чија цел е да се стави крај на војната во Украина, изјави портпаролката на Стејт департментот, Теми Брус.
Откако разговараше со својот британски колега, Рубио на социјалната мрежа Икс објави дека ќе го одложи патувањето и ќе го посети Обединетото Кралство во наредните месеци.
Разговорите ќе продолжат, а на нив ќе присуствува и претставникот на претседателот Доналд Трамп за Украина, генерал Кит Келог, додаде тој.
Сепак, не е јасно дали неговото отсуство значи дека Трамп ги намалил очекувањата на Вашингтон за состанокот во Лондон откако во неделата изјави дека се надева оти Москва и Киев ќе постигнат договор оваа недела за прекин на конфликтот во Украина.
„Во овој момент, додека состаноците во Лондон сè уште се во тек, тој нема да биде присутен. Сепак, оваа изјава не се однесува на самите состаноци, туку на логистички прашања во неговиот распоред. Генералот Келог е таму и ќе учествува во разговорите“,
изјави Брус за новинарите на редовниот брифинг.
Одлуката уследи по предупредувањето дека САД ќе се повлечат од напорите за постигнување мировен договор меѓу Русија и Украина доколку наскоро нема јасни знаци за напредок.