Американските напади, изведени со борбени авиони „Ф-16“, се одвоени и различни од актуелниот конфликт помеѓу Израел и Хамас. Израел не беше координиран ниту известен однапред за нападите, вели американскиот секретар за одбрана
Врз две локации во источна Сирија, каде што се наоѓаат групи поврзани со иранската Револуционерна гарда, од рано утринава американски ловци изведуваат воздушни напади, како одмазда за нападите што почнаа минатата недела врз американските војници во регионот, соопшти Пентагон, пренесува „Гардијан“.
Во нападите се погодени складиште за оружје и муниција што ги користи иранската Револуционерна гарда и милицијата што таа ја поддржува, пренесува „Ројтерс“ изјава од високи американски претставници додавајќи дека не е јасно дали се убиени ирански државјани.
Нападите се случиле околу 4:30 часот во близина на Абу Камал, сириски град на границата со Ирак.
Американскиот секретар за одбрана Лојд Остин во изјава што ја пренесува „Гардијан“ вели дека прецизните самоодбранбени напади рано утрово се одговор на нападите со беспилотни летала и ракетни напади на милициските групи поддржани од Иран против американските бази и персонал во Сирија и Ирак кои започнаа минатата недела.
Тој рече дека претседателот Џо Бајден ги наредил тесно приспособените напади за да стане јасно дека САД нема да толерираат такви напади и дека ќе се бранат себеси, својот персонал и своите интереси.
Остин додава и дека САД не сакаат поширок конфликт, но дека ако групите сојузници на Иран продолжат да напаѓаат, САД нема да се двоумат да преземат дополнителни мерки за заштита на своите сили.
Тој додаде дека овие американски напади, изведени со борбени авиони „Ф-16“, се одвоени и различни од актуелниот конфликт помеѓу Израел и Хамас.
„Израел не беше координиран ниту известен однапред за нападите“,
изјави Остин.
Околу 900 дополнителни американски војници се упатени или неодамна се пристигнати на Блискиот Исток за да ја зајакнат противвоздушната одбрана и да го заштитат американскиот персонал во услови на пораст на нападите во регионот од групи поврзани со Иран, соопшти Пентагон, пренесува Индекс.хр.
Американскиот претседател Џо Бајден испрати ретка порака до иранскиот врховен верски лидер, ајатолахот Али Хамнеи, предупредувајќи го Техеран да не ги гаѓа американските војници на Блискиот Исток, соопшти Белата куќа, по серијата напади врз американските сили во регионот.
Според Пентагон, од 17 октомври досега имало најмалку 12 напади врз американски бази и персонал во Ирак и четири во Сирија. Повеќе од 24 американски војници се здобија со полесни повреди, додека еден има претрпено срцев удар и починал додека барал засолниште од можен напад со беспилотно летало.