Новата амбасадорка на САД, во својот прв јавен настап по предавањето на акредитивните писма, порача дека борбата против корупцијата во Северна Македонија ќе ја направи број еден приоритет на американската амбасада, но и оти таа борба мора да ја водат граѓаните на оваа држава, а САД ќе бидат тука да ги поддржат
На младите овде, рече Агелер, им треба и тие заслужуваат земја во која успехот се заснова на талент и напорна работа, а не на политика или на тоа кого познавате
Корупцијата во која било форма – непотизам, несоодветно политичко влијание, фаворизирање при вработување или потпишување договори итн., ја кочи оваа земја во економскиот, социјалниот, образовниот и структурниот успех што знаеме дека може и треба да продолжи да се постигнува.
Ова е една од пораките што новата американска амбасадорка во земјава, Анџела Агелер, ги испрати на синоќешното одбележување на 20-годишнината од постоењето на Државната комисија за спречување корупција (ДКСК), што е прв нејзин јавен настап по предавањето на акредитивните писма.
„Северна Македонија е стратешки партнер на САД. Таа е наш сојузник, најнова членка во НАТО. И таа е наш пријател. Како и секое пријателство и ова е повеќеслојно. Пријателството не претставува само согласување и кажување работи што пријателот сака да ги слушне. Пријателство значи совет, значи водство и значи искреност, кога тоа е потребно“,
рече Агелер.
Од говорницата на настанот во Музејот на македонската борба, таа испрати пораки до политичарите, до јавноста и до службениците дека треба сите да се обврзат и да бараат одговорност.
„Ги видовме иницијативите на ДКСК за отворање кривични постапки против јавни функционери за коруптивни дела. Слушаме што се случува зад сцената со манипулации за назначувањата на клучни позиции. Читаме за профитабилни тендери што завршуваат кај фирми со политички или лични врски. Затоа да се обврземе сега – јавноста, политичарите, владините службеници – да ја отповикаме корупцијата и да бараме одговорност од корумпираните актери. Неказнивоста мора да заврши“,
порача Агелер.
Северна Македонија, наведе амбасадорката, е успешна приказна, меѓутоа она што го попречува напредокот и натаму е корупцијата.
„Од вашата независност пред 31 година, вие станавте членка на НАТО, вие сте на вашиот пат кон ЕУ и изградивте стабилно, мултиетничко општество на Западен Балкан. Сепак, и денес корупцијата го попречува напредокот на Северна Македонија и ја загрозува нејзината најголема природна вредноста – младите. Една неодамнешна анкета покажа дека корупцијата е главна причина поради која младите сакаат да ја напуштат Северна Македонија – порака што ја слушнав и во разговорите што ги имав откако се вратив тука пред девет дена. На младите овде им треба и тие заслужуваат земја во која успехот се заснова на талент и напорна работа, а не на политика или на тоа кого познавате“,
рече амбасадорката.
Промената на оваа траекторија, според неа, ќе бара и промена на политичката култура и политичката волја. Затоа, порача амбасадорката, тие мора да се залагаат за систем кој е транспарентен од почеток до крај и во кој има добро владеење што ќе опстојува долгорочно без разлика кој е на власт.
Токму борбата против корупцијата, рече Агелер, ќе ја направи приоритет број еден на американската амбасада во Скопје, но треба да се борат и луѓето овде.
„Она што е, исто така, точно и најважно е дека вие – народот на оваа земја, мора да ја водите таа борба. САД ќе бидат тука да ги поддржат сите напори, но ова мора да биде и ваш избор. И јас сум убедена дека заедно можеме да направиме суштински промени за да се справиме со корупцијата“,
рече Агелер.
На крајот од обраќањето, таа ѝ честиташе на ДКСК за 20-годишната работа и порача дека ги поздравува нивните напори.