Алиу: Тројца од повредените во пожарот во Кочани сè уште се на лекување во странство, нивната здравствена состојба е стабилна

Втората група на повредени пациенти од пожарот во „Пулс“ се очекува да замине на рехабилитација во одморалиштето на Пониква втората половина на јули. Првата група е веќе таму и со нив се и пет физиотерапевти кои работат по програми, специјалист физијатар и општ хирург, соопшти Алиу

Тројца од повредените во пожарот во „Пулс“ се уште се на лекување во странство и според информациите, нивната здравствена состојба е стабилна, кажа министерот за здравство Азир Алиу. Двајца од повредените како што рече, се лекуваат во Турција и еден е во Словенија. На Клиниката за пластична хирургија има пациенти кои се таму поради длабочината на повредите, а здравствено се стабилни, посочи Алиу и додаде дека двајца пациенти се во приватната болница „Систина“.

„Во Пониква во моментов е првата група, при крај, таму со нив се и пет физиотерапевти кои работат по програми, специјалист физијатар и општ хирург. Таму младите сакаат да продолжат и понатаму, имаме барања од некои од нив да продолжат и со втората група. Втората група ќе биде упатена најверојатно од втората половина на јули,“

рече министерот за здравство Азир Алиу.

Првата група од 45 повредени е на рехабилитација во одморалиштето на Министерството за внатрешни работи (МВР) на Пониква. Тие се под медицинска грижа на лекари специјалисти од Клиниката за пластична хирургија во Скопје, како и физиотерапевти од Кочани и Штип.

Првата група од 45 повредени од пожарот во Кочани од викендов се на рехабилитација на Пониква

Во врска со обвинувањата на семејствата на загинатите во пожарот во Кочани, за несоодветен третман во болницата во Кочани и недостиг на соодветна опрема, министерот рече дека истрагата од надлежните служби, би требало да даде одговор на многу прашања во врска со трагедијата.