Во однос на вклучувањето на странски експерти во истрагата за можни злоупотреби во приватни здравствени установи и дали се правеле операции на срце без основани медицински причини, Алиу истакна дека тие во оваа фаза не се активно вклучени, туку само комуницираат
Министерот за здравство Азир Алиу вели дека конечниот извештај на домашната комисија што ја формира Министерството за здравство за сомнителните кардиохируршки интервенции сè уште не е достапен за јавноста. Тој повтори дека се отворени пет нови случаи кои се предмет на анализа од страна на Комисијата, покрај претходните осум предмети кои веќе се завршени.
Алиу рече дека извештајот ќе биде објавен на веб-страницата на Министерството дури откако ќе бидат готови сите случаи што се предмет на анализа.
Во однос на вклучувањето странски експерти во истрагата за можни злоупотреби во приватни здравствени установи и дали се правеле операции на срце без основани медицински причини, Алиу истакна дека тие во оваа фаза не се активно вклучени, туку само комуницираат.
„Чекаме нашата комисија да заврши со наодите, тоа се сензитивни процеси, и потоа ќе имаме заеднички состанок на локалниот експертски тим со странскиот“,
рече Алиу одговарајќи на новинарско прашање во општина Бутел, каде што беше најавена изградба на нова поликлиника во Општина Бутел.
Тој најави дека по добивањето чист случај, ќе се дефинираат политики, ќе се разгледаат законски измени и ќе се воспостават појасно дефинирани протоколи за овој тип здравствени услуги.
Паралелно со работата на случаите, министерот најави дека се работи на проширување на меѓународната соработка. Освен меморандумот со Словенија, најавен е сличен пристап и со Италија и Австрија.
Целта, како што рече, е да се најдат можности за соработка не само од клиничка (обука на доктори и доаѓање на експерти), туку и од административна гледна точка, особено со земји што имаат сличен здравствен систем.
„Гледаме дека многу полесно може да комуницираме со земји што имаат сличен здравствен систем. Освен со Словенија, кој текст се дефинира, најавувам дека сличен пристап ќе имаме и со Италија и со Австрија“,
рече Алиу.
Соработка со Словенија, Италија и Австрија, Алиу најави и за обука на кадар. Тој вели дека домашниот кадар ќе оди на краток престој таму, а ќе се работи и на тоа доктори, експерти кои живеат надвор од нашата држава да можат да бидат активни и да се вклучат во нашиот здравствен систем.
Одговарајќи на новинарско прашање кој ќе работи во новата поликлиника во општина Бутел бидејќи има недостиг на специјалисти во останатите поликлиники во Град Скопје, Алиу рече дека работат и веќе има работна група за национална стратегија за креирање човечки капацитети во здравството.
„Здравството е менаџирано ад хок, со ад хок решенија, а единствен ресор кој не бара ад хок решенија е здравството. Вие морате да проектирате за 10 години и инфраструктура и човечки капацитети. Ние впрочем тоа и го правиме. Веќе правиме национална стратегија за човечки капацитети и ќе знаеме за 10 години колку ќе имаме студенти, колку паралелки ќе имаме во средното медицинско училиште за лаборанти и за техничари и ќе може да проектираме понатаму каде и каков тип на професионалци ни треба“,
рече Алиу.