Заштитата на нашиот физички, морален и психолошки интегритет е должност на секој од нас, па затоа и ние сме за вакцинација, но сме против задолжително вакцинирање, велат од опозициската коалиција
Владата треба да најде друг начин за да ги убеди граѓаните да се вакцинираат против ковид-19, според опозициската коалиција Алијанса за Албанците /Алтернатва, наместо, како што велат, со нови рестрикции што прераснуваат во условувања и обврски.
„Заштитата на нашиот физички, морален и психолошки интегритет е должност на секој од нас, па затоа и ние сме за вакцинација, но сме против задолжително вакцинирање. Останува на Владата да најде други начини да ги убеди граѓаните да ја прифатат вакцината“,
велат од коалицијата.
Оттаму посочуваат дека, со оглед на тоа што бројот на заразени со делта сојот расте во последните денови, Владата, наоѓајќи се во незавидна ситуација, одлучи да објави нови рестриктивни мерки, преку одредени услови.
„Условеноста се претвора во обврска, така што новите владини мерки, со кои се „овозможува“ на граѓаните да ги уживаат своите права под услов да бидат вакцинирани, не се ништо друго освен камуфлирана задолжителна обврска под услов, со која се зголеми скептицизмот и негативно влијае на економијата на земјата. Оваа задолжителна вакцинација го зголемува стравот на граѓаните да ја прифатат вакцината, додека исто така е спротивно со основните човекови права. Во овој поглед, се крши правото на слободен избор на граѓаните, додека граѓаните кои одбиваат да се вакцинираат се дискриминирани и нивните права гарантирани со закон се кршат. Исто така, од неуспешните мерки на оваа влада, граѓаните стануваат посиромашни, додека економијата на земјата е во постојан пад“,
оценуваат од Алијанса/Алтернатива.
Од опозициската коалиција посочуваат и дека, како резултат на новите мерки, предизвикан е хаос пред пунктовите за вакцинација, што влијае на ширењето на вирусот и докажува, како што се нагласува, дека во С Македонија има многу малку антиваксери, а повеќе неинформирани, дезинформирани или немотивирани граѓани.
„Затоа бараме укинување на овие мерки или нивна модификација, во соработка со професионалци од областа, кои се запоставени од здравствените власти од причини што не можеме да ги разбереме. Низ векови имаме различни случаи кои докажуваат дека, и покрај многуте одбивања, вакцината е најсилното оружје за заштита на јавното здравје. Затоа и во нашиот случај вакцинацијата е надеж за враќање во нормала“,
велат од Алијанса/Алтернатива.