Одлуката за разрешување на својот заменик ја донела по добиена жалба од албански државјанин што живее во Њујорк, кој изрази загриженост дека заменик-министерот за внатрешни работи пушел цигара во ресторан, односно на недозволено место
Албанската министерка за внатрешни работи Албана Кочиу го разреши својот заменик Анди Махила, поради тоа што пушел цигари на недозволено место, пренесува албанскиот портал „Албаниан дејли њуз“.
Оваа одлука предизвика изненадување во албанската јавност, со оглед дека Махила на функцијата заменик-министер за внатрешни работи е од јануари 2021 година.
Министерката Кочиу ја потврди информацијата за разрешување на својот колега и на Фесбук, посочувајќи дека одлуката ја донела по добиена жалба од албански државјанин што живее во Њујорк.
„Го потврдувам она што беше објавено во медиумите во врска со разрешувањето на заменик-министерот. Добив жалба од наш сонародник во Њујорк, кој, заедно со своето семејство, изрази загриженост поради фактот што заменик-министерот за внатрешни работи пушел цигара во ресторан. Направив соодветна проверка и го соопштив разрешувањето на заменик-министерот“,
напиша таа на Фејсбук.
Според неа, таквото однесување не може да се смета за случајна грешка, туку за јасно прекршување на законот, особено кога е извршено од висок функционер на Министерството за внатрешни работи.
Министерката додаде и дека за ова е информиран и граѓанинот што го пријавил однесувањето на Махила и оти неговата загриженост е сфатена сериозно, додавајќи дека секоја таква во иднина ќе биде третирана со еднаква сериозност.
Албана Кочиу е првата жена на чело на полицијата во историјата на Албанија. Во минатата влада таа беше министерка за здравство.
Анди Махила, како заменик-министер, имаше значајна улога во управувањето со Министерството за внатрешни работи. Неговата работа се фокусираше на различни аспекти на безбедноста, вклучувајќи ја борбата против организираниот криминал и подобрувањето на соработката со меѓународните агенции.
Албанската влада положи заклетва на 19 септември, а парламентот го потврди четвртиот мандат за премиерот Еди Рама, кој објави дека приоритет на новата влада ќе биде членство на земјата во Европската Унија до 2030 година.