Докторката Мирјета Дервиши од Институтот за јавно здравје, презентирајќи ги последните податоци изјави дека од направените 847 тестови, позитивен резултат е добиен кај 155 од нив, што е речиси константна бројка во овој месец во Албанија.
„И понатаму главно жириште на болеста е Тирана, каде од новозаразени се 77 лица, по што следува Драч со 18 и Елбасан со 11 случаи. Во изминатите 24 часа во списокот на оздравени се внесени 58 лица или 3 986 од вкупно заразените 7 967. За жал, починаа четири пациенти или вкупно 238 досега. Активни на болеста се 3 743 лица“,
рече Дервиши.
Од почетокот на март, кога беа регистрирани првите два случаи, татко и син, по нивното враќање од Италија, до сега направени се 53 571 тест.
Вчера во Албанија почна кампањата „ Биди херој за оној кому си му потребен“ за донирање крвна плазма за лекување на болните од коронавирус.
„До попладнево крвна плазма даруваа шест лица кои го прележале коронавирусот. Меѓу нив е и директорот на Националниот ургентен центар, Скендер Братај, кого не го одмина опасниот вирус, но за среќа излезе победник со опасниот невидлив непријател. Тоа значи дека почнуваме со лекување со ковалесцентна плазма на пациентите кои се во потешка состојба“,
изјави заменик директорка на Националниот центар за трансфузиологија, Ирена Сефери.
Во моментот во двете ковид болници во Тирана се хоспитализирани 121 пациент, од нив 26 се во тешка здравствена сосотојба.