Најсериозни се оние во општина Македонски Брод, каде што горат деградирана дабова шума, грмушки и ниска вегетација помеѓу неколку села
Од вкупно регистрираните 12 пожари денеска, до 18 часот и 30 минути, активни се само четири, додека, пак, осум се успешно изгаснати, информираат од Центарот за управување со кризи (ЦУК). Оттаму велат дека од активните, најсериозен е оној кај селата Црешнево, Локвица, Крапа и Слатина на територија на општина Македонски Брод, каде што горат деградирана дабова шума, грмушки и ниска вегетација. Сè уште се активни пожарите кај општина Чучер Сандево и општина Дојран, кај селото Николиќ, каде неколку денови гори нискостеблеста шума. Активен пожар има и во општина Велес, во близина на селата Џидимирци и Крушје, каде што гори мешана шума.
Од ЦУК информираат дека се изгаснати осум пожари на различни локации. Во Прилеп, во населбата Три Багреми, е изгаснат пожар во ниска вегетација. Во општина Виница се изгаснати два пожари – во селото Драгобрашта, каде што горела деградирана ниска вегетација, и во селото Лески, каде што било запалено ѓубре.
„Пожари се изгаснати и во село Војшанци, општина Демир Капија, како и во село Франгово, општина Струга, каде што било запалено стрниште. Во Липково, во село Отља, и во Тетово, во селата Пршове – Јегуновце и Стримница – Фалиште, се изгаснати пожари во деградирана ниска вегетација“,
информираат од ЦУК.
Оттаму велат и дека граѓаните треба да бидат внимателни при движење и активности во природа, особено во услови на високи температури и суво време, кое значително го зголемува ризикот од појава и ширење на пожари.