Активистката за легализација на марихуана, Моника Ристеска алијас Конопова, вчеравечер била нападната од својот татко, при што ѝ бил скршен носот. Како што објави Моника на социјалните мрежи, тој ја нападнал со дрвен стол во нивниот дом во скопската населба Геге. Таа сподели и вознемирувачки фотографии на кои е облеана во крв.
Ристеска уште вчера го пријавила случајот во полиција, а ѝ била пружена и медицинска помош во една од скопските болници.
Министерството за внатрешни работи во врска со овој случај информираше дека вчера околу 22:30 часот на ул. „Антон Чехов“ во Скопје, полициски службеници од СВР-Скопје го лишиле од слобода С.Р. (64) од Скопје поради постоење основано сомнение дека сторил кривично дело.
Претходно, неговата ќерка М.Р. (31) од Скопје пријавила дека околу 20:30 часот во семејниот дом на ул. „Антон Чехов“, по претходна расправија, таа и нејзината мајка К.Р. (62) од Скопје биле физички нападнати од нејзиниот татко С.Р. (64) од Скопје. Се преземаат мерки за расчистување на случајот.
Министерот за внатрешни работи Наќе Чулев, огласувајќи се на Фејсбук по повод овој случај, рече дека граѓаните треба да ги пријавуваат сите форми на насилство, а полицијата ќе постапува професионално во сите случаи.
„Како министер, но пред сè како човек го осудувам секој вид насилство, особено семејното насилство кое е насочено врз жените. Ги охрабрувам граѓаните да ја пријавуваат секоја форма на насилство, а Министерството за внатрешни работи ќе постапува професионално во насока на негово целосно расчистување“,
напиша Чулев.