Османи соопшти дека добил уверување од турскиот колега, Мевљут Чавушоглу, дека присуството на Турција во Кабул е стабилно и дека ќе имаат предвид, ако е потребно, да помогнат и за македонски државјани
Ако се јави потреба, Турција ќе помогне за извлекување на македонски државјани од Авганистан. Шефот на македонската дипломатија, Бујар Османи соопшти дека добил уверување од турскиот колега, Мевљут Чавушоглу дека присуството на Турција во Кабул е стабилно и дека ќе имаат предвид, доколку се појави потреба, да помогнат и при извлекување и на наши граѓани.
„Само што остварив контакт со мојот турски колега Мевљут Чавушоглу околу состојбата во Авганистан. Со оглед дека Турција има широко дипломатско и логистичко присуство во Кабул, побарав евентуална асистенција доколу се појави потреба за извлекување и на нашите граѓани таму. Добив уверување од колегата Чавушоглу дека нивното присуство во Кабул е стабилно, дека располагаат со доволно логистички капацитет за трансфер на нивните граѓани, и дека ќе имаат предвид, доколку се појави потреба, да помогнат и при извлекување и на наши граѓани. Благодарам Турција“
објави Османи на Фејсбук.
Македонското МНР попладнево соопшти дека во Авганистан сѐ уште има околу 100 наши државјани, но засега сите се на безбедни локации. Во последните 24 часа, на дежурните телефони во МНР се јавиле неколку граѓани кои имаат роднини или пријатели во Авганистан и се интересирале за состојбата таму, но не побарале асистенција за нивно извлекување.