Доколку оваа постапка биде успешна, тогаш ќе се влезе во фаза на преговори со таа консултантска куќа и компанијата „Бехтел и Енка“, по што ќе има следен чекор и договор за реализација на овие автопатски делници
Постапката за избор на консултант и надзор за коридорите 10 и 8 е сè уште во тек, а по завршувањето Јавното претпријатие за државни патишта ќе ги информира Владата и јавноста дали се јавиле и колку компании се во игра за да ја добијат оваа постапка и да бидат консултантска куќа и надзор на изградбата на
овие патишта, вели министерот за транспорт и врски Благој Бочварски.
Доколку, рече тој, оваа постапка биде успешна, тогаш ќе се влезе во фаза на преговори со таа консултантска
куќа и компанијата „Бехтел и Енка“, по што ќе има следен чекор и договор за реализација на овие автопатски делници.
„Сакам да потенцирам дека од исклучително значење е подобрувањето на инфраструктурата, надградувањето на едно повисоко ниво на нашите клучни коридори, коридорот 10 и 10-Д и 8, што и несомнено го правиме“,
додава Бочварски.
Министерот смета дека прво треба да се избере консултантската куќа, да се влезе во преговори и доколку тие бидат успешни и се склучи договор меѓу државата и компанијата „Бехтел и Енка“ веднаш потоа ќе се влезе во фаза на проектирање и сите постапки како експропријација, за да се започне и непречено да се гради.
На прашањето која делница ќе почне прва да се гради, Бочварски рече дека доколку на делницата од Гостивар кон Кичево нема многу земјиште кое е приватно, таму треба да се оди со побрзо отпочнување на градежните работи.
„Делницата од Гостивар кон Кичево ќе оди по сосема нов терен и сметам дека таму ќе има можност доколку нема многу земјиште кое е приватно да се оди со побрзо стартување на градежните работи. Исто така, и за делницата Прилеп – Битола и Тетово – Гостивар имотно-правните прашања се важни за да се отстранат за да градежните работи почнат и да се работи непречено“,
додава Бочварски.
Инаку, на повторената постапка за избор на надзор и консултант за автопатите што ќе ги гради конзорциумот „Бехтел и Енка“ ќе може да се доставуваат понуди до 17 октомври, а по 30 дена ќе се избира најповолниот понудувач.
„Огласот за јавната набавка за надзор и правен трансакциски советник за изградба на коридорите 8 и 10-Д е објавен на 15.9.2022 година и доставувањето на понудите е најдоцна до 17.10.2022 година во 11:00 часот, по што ќе се одржи јавното отворање на понудите во Јавното претпријатие за државни патишта. По отворањето на понудите, ќе следува период од 30 дена за евалуација и избор на најповолен понудувач. Целата постапка, нагласуваат оттаму, се одвива согласно со Закон за јавни набавки и роковите предвидени со нив“,
информираа за МИА од ЈПДП.
Како што изјави претходно министерот Бочварски, по заокружувањето на новата постапка за избор на надзор и консултант за автопатите, се очекува подготвителните работи да завршат до крајот на годината, а по проектирањето и експропријацијата во текот на следната година да има работа на терен.
Со огласот на ЈПДП се избира консултант и надзор што ќе ја следи градбата на автопатските делници Тетово – Гостивар, Гостивар – Кичево и Требениште – Струга – Ќафасан на Коридорот 8, како и Битола – Прилеп на Коридорот 10-Д од страна на конзорцоумот „Бехтел и Енка“.
Првиот тендер за избор на надзор за овој проект пропадна откако избраната компанија не ја достави банкарската гаранција.