Премиерот вели оти чувствува дека има поединци кои се обидуваат политиката во земјава да ја направат естрада и оти тие немаат намера да се занимаваат со такви работи
Во животот постојат два начини на одговорност – едниот е морален, кога човек ќе извршува одредена функција и ако направи грешка тогаш треба самиот да се повлече, вториот е кривичен, доколку има сторено кривично дело, одговори премиерот Христијан Мицкоски на прашањето дали ВМРО-ДПМНЕ ќе започне постапка за разрешување на претседателката на Државната комисија за спречување корупција, Татјана Димитровска, во Собранието, каде што претседател на Комисијата доаѓа од неговата партија.
Премиерот вели оти тој чувствува дека во земјава има поединци кои се обидуваат политиката да ја направат естрада и дека политиката треба да се остави на политичарите.
„Што ако ВМРО-ДПМНЕ поднесе или друга партија поднесе, за Судскиот совет поднесовме, ги разрешивме, тие уште седат таму, добиваат илјадници евра на грбот на граѓаните“,
рече Мицкоски.
Дополнително, вели дека постои морален чин на одговорност и оти ако некој чувствува дека треба да отстапи и да заврши со работата, но и кривична, но тука се обвинителството и судовите и оти тие треба да гонат ако има кривична одговорност.
„Ние не сакаме да правиме естрада, па во парламентот, па тоа ништо не значело според Уставот. Повеќе немаме намера да се занимаваме со такви работи“,
кажа премиерот.
Претходно денеска од ДКСК соопштија дека Собранието е единствената институција која може да донесе одлука за разрешувањето на претседателот на Државната комисија за спречување на корупцијата согласно Законот за спречување на корупцијата и судирот на интересот и оти во однос на личната одговорност, поднесувањето оставка како етички и морален чин, сепак, е одлука и право на самата претседателка.
Пред два дена од оваа институција, во одговор за „360 степени“ потенцираа оти Државната комисија за спречување на корупцијата има кредибилитет да ја продолжи својата работа и оти претседателката сама треба да каже дали ќе си поднесе оставка.
Пред три дена Јавното обвинителство за гонење организиран криминал покрена обвинение за претседателката на Државната комисија за спречување на корупција, Татјана Димитровска.
Јавно беше познато дека е осомничена за оддавање службена тајна во предметот „Адитив“, но освен за тоа дело, во обвинението се товари и за компјутерски фалсификат. Вработен во Државниот завод за ревизија полагал испит за класифицирани информации во нејзино име.