„Ако јавноста не сака, нема да потпишеме“, вели Мицкоски по најавите дека „Ѓока констракшн“ ќе стопанисува со паркингот на Клинички

„Јас разбирам дека уредувачката политика на поедини медиуми има за цел да растури пердуви со невистини и конструкции, да обвинува неосновано и ние сега како политичари треба да сме дефанзивни и да се браниме“, изјави премиерот Христијан Мицкоски

Одлука на Влада нема, договор не е потпишан, а ако јавноста вели – не сакаме, нема да го потпишеме, изјави денеска премиерот Христијан Мицкоски по најавите дека албанската компанија „Ѓока констракшн“ ќе стопанисува со паркингот на клиничкиот центар „Мајка Тереза“ во Скопје.  

Мицкоски ја нападна уредувачката политика на, како што рече, поедини медиуми која има за цел да шири невистини.

 „Јас би внимавал со заклучоците и не би се сложил со вас. Јас разбирам дека уредувачката политика на поедини медиуми има за цел да растури пердуви со невистини и конструкции, да обвинува неосновано и ние сега како политичари треба да сме дефанзивни и да се браниме. Факт број еден – одлука се носи врз основа на физибилити-студија, физибилити-студија така кажала. Второ, распишан е оглас, се јавила само една компанија иако критериумите се прилично широки. Трето, ништо не е потпишано, ништо не е завршено. Ја слушаме ние јавноста. Јавноста е незадоволна. Од сето ова што претходно го кажав сè е според закон, тоа не значи дека ќе потпишеме договор. Одлука на Влада нема, договор не е потпишан, ако јавноста вели – не сакаме, нема да го потпишеме“,  

рече Мицкоски.

Премиерот се повика на физибилити студијата изработена од претходната влада според која паркингот во клиничкиот центар „Мајка Тереза“ треба да биде менаџиран од приватен оператор. Ги повика Градски паркинг – Скопје да направат ред бидејќи Клиничкиот центар не функционира, како што кажа, во нормални услови. 

„Ние сакавме како Влада гужвата и оние услови кои таму се случуваат да ги организираме. Таму стопанисува Градски паркинг – Скопје, еве тие нека направат ред, немаме ние против, само нека се реши гужвата и тие од Свети Николе кога ќе дојдат да имаат пристојни услови нормално да функционираат и нормално да функционира Клиничкиот цернтар. Физибилити студијата од претходната влада самата така вели“,

смета Мицкоски.

Порталот „Призма“ објавија дека приватниот оператор од Албанија, „Ѓока Констракшн“ е единствена компанија што се јавила на повикот за јавно-приватно партнерство.

„Призма“: Албанската „Ѓока констракшн“ ќе стопанисува со паркингот на Клинички центар

Како што објави „360 степени“, потенцијалниот концесионер ќе биде обврзан да инвестира во две монтажни катни гаражи и да стопанисува со целиот паркинг на Клинички, а за возврат на државата ќе треба да и префрли само еден отсто од годишните приходи.

(ВИДЕО) Катни гаражи на Клинички – решение за паркинг или „златна кокошка“ за идниот концесионер

Министерот за здравство Арбен Таравари, пак, изјави дека наместо 30 денари како досега, идниот концесионер ќе може да наплаќа 50 денари за еден час паркирање.