Како што додаде бугарскиот министер за транспорт и врски, на преминот „Клепало“ ќе има само една заедничка гранична контрола, што ќе го олесни и забрза движењето на граѓаните
Патот до граничниот премин „Kлепало“ е долг само 13 километри, а ако ги добиеме поскоро еколошките дозволи, ќе биде завршен до крајот на годинава, рече денеска бугарскиот министер за транспорт и врски Николај Сабев по средбата со својот македонски колега Благој Бочварски и нагласи оти на овој премин ќе има само една заедничка гранична контрола, што ќе го олесни и забрза движењето на граѓаните.
„Отсечката е само 13 километри, но треба да добиеме дозвола од Министерството за животна средина и просторно планирање за една многу сложена и тешка процедура што сме ја прифатиле како закон. Ако имаме дозвола од екологистите да можеме да работиме, од Министерството за регионален развој на Бугарија се подготвени веднаш да почнат со ова. Тринаесет километри не е голем напор. А тоа што ние го продискутиравме со Бочварски, е да имаме еден премин каде што на едно место ќе се извршуваат сите тие формалности кога се поминува на граничниот премин. Тоа е нашата желба“,
истакна Сабев.
Од македонска страна патот до Клепало е веќе направен, а изграден е и објектот на граничниот премин.
Во однос на железничко поврзување на двете земји, пак, бугарскиот министер за транспорт и врски информира оти Бугарија ќе направи напори за железничко поврзување преку тунелот „Деве Баир“, за што поскоро да се пробие тунелот под преминот.