По средбата на шефот на дипломатијата Бујар Османи со неговиот француски колега Жан-Ив Ле Дриан, француското МНР соопшти оти во случај на договор помеѓу Северна Македонија и Бугарија, Франција е решена да организира меѓувладини конференции меѓу Европската Унија и Северна Македонија и Албанија
Франција е решена, во случај на договор меѓу Северна Македонија и Бугарија, да организира меѓувладини конференции меѓу Европската Унија и Северна Македонија и Албанија, се огласи француското Министерство за надворешни работи и Европа по средбата на шефот на француската дипломатија, Жан-Ив Ле Дриан со неговиот колега од С Македонија, Бујар Османи.
Францускиот министер за Европа и надворешни работи Дриан, како што се вели во соопштениот на Кеј Д’Орсеј, на 11 мај разговараше со неговиот македонски колега Бујар Османи, на маргините на министерскиот состанок на глобалната коалиција против ДАЕШ во Маракеш, за решавање на спорот меѓу Бугарија и Северна Македонија и ситуацијата во Украина по војната што ја започна Русија на 24 февруари.
„Францускиот министер ја подвлече целосната поддршка на Франција за постигнување балансиран и заемно прифатлив компромис меѓу Бугарија и Северна Македонија. Тој потсети дека Франција е решена, во случај на договор, да организира меѓувладини конференции меѓу Европската Унија и Северна Македонија и Албанија што е можно поскоро за време на нејзиното претседавање со Советот на Европската Унија“,
се вели во соопштението.
Министерот Дриан ја повторил француската поддршка за европската перспектива на земјите од Западен Балкан и ја споменал организацијата следниот јуни, во рамките на француското претседателство со Советот на ЕУ, на конференција меѓу ЕУ и земјите од Западен Балкан, која треба да придонесе за тоа.