„Пред пет дена донесовме решение за забрана за увоз од Албанија поради чума кај малите преживари. Алармирани се полицијата, армијата, сите ветеринарни друштва и официјалните ветеринари кои мора да бидат претпазливи“, информира директорот на Агенцијата за храна и ветеринарство Оливер Миланов
Агенцијата за храна и ветеринарство (АХВ) забрани увоз на пилешко месо од Бразил поради птичји грип, а забранет е и увоз и транзит на домашни и диви мали преживари, месо, млеко, нивни преработки и нуспроизводи од домашни и диви мали преживари од Албанија по појавата на чума кај овие животни.
„Пред пет дена донесовме решение за забрана за увоз од Албанија поради чума кај малите преживари. Алармирани се полицијата, армијата, сите ветеринарни друштва и официјалните ветеринари кои мора да бидат претпазливи. Минатата година болеста ја имаше во Грција, за еден ден беа уништени околу 16 000 грла, но ние успеавме да не дозволиме да се појави кај нас“,
изјави директорот на АХВ, Оливер Миланов.
Во обраќањето на трибината за подигнување на јавната свест за безбедноста на храната, Миланов информира дека од почетокот на годинава како небезбедни досега се уништени околу 56 тони храна од животинско и неживотинско потекло, а оти дополнителни контроли се вршат за секоја пратка која се увезува во земјава.
„Од почетокот на годинава како небезбедни вратени се 10 пратки, најголемиот дел поради увоз од забранети региони/држави. Уништена е една пратка со храна од животинско потекло со тежина од 207 тони, а како небезбедни уништени се и околу 30 тони храна од неживотинско потекло, повеќе од половината небезбедна минерална вода од увоз, поради бактериолошка загаденост, недоволна јодираност на сол и утврдени остатоци од пестициди во зеленчук“,
потенцира директорот на АХВ.
Според него, во синџирот на безбедна храна, покрај науката, институциите и операторите, многу важна алка се и граѓаните кои често алармираат за недоследности. Од почетокот на годинава, како што рече, преку Одделението за заштита на потрошувачите поднесени се повеќе од 360 иницијативи за вршење на инспекциски надзор.