Агенцијата за храна и ветеринарство бара од сопствениците на угостителски објекти пред најавата дека е можно од следната недела некои од нив да бидат отворени да спроведат дезинфекција и чистење на опремата и на површините за обработка на храна и да го дезинфицираат целиот објект.
Директорот на оваа инспекциска агенција, Зоран Атанасов, на денешната прес-конференција на Инспекцискиот совет рече дека и забелешките од досегашните надзори што се направени од почетокот на вонредната состојба се однесуваат токму на лошите хигиенски услови – за чување на храната и на површините каде што се обработува, или на немањето сертификати кај вработените за безбедност во ракување со храна, како и за неспроведени санитарни прегледи.
Атанасов истакна дека овие забелешки не се однесуваат само на спречување на ширењето на коронавирусот, туку и воопшто за спречување на евентуално ширење на болести преку храната.
Во периодот од 27 април до 3 мај Агенцијата за храна и ветеринарство спровела 154 надзори во повеќе градови, и тоа во маркети, угостителски објекти, месарници, зелени пазари при што се изречени 5 казнени мерки поради немање обука за безбедност на храна и 12 решенија за лоша општа хигиенска состојба.
Министерот за здравство Венко Филипче на вчерашната прес-конференција рече дека како дел од натамошното олеснување на рестрикциите може да се очекува од следната недела да бидат отворени некои објекти, но како што рече, прво тоа ќе бидат оние кои ќе можат да понудат шалтерски услуги.