Од Агенцијата потенцираат дека сомнежите во јавноста и споделените видеа за начинот на собирање и отстранување на затекнатата живина во одгледувалиштето се во целост со почитување на протоколите за сузбивање и искоренување на авијарна инфлуенца и Законот за благосостојба на животните и меѓународните протоколи
ЗОО Скопје иако детектиралa угинато животно уште пред шест дена (на 14.10.2024 година), не постапила по законски процедури, односно не пријавила сомнеж на заразна болест до надлежниот официјален ветеринар, информираа денеска од Агенцијата за храна и ветеринарство (АХВ). Со ова, додаваат оттаму, раководството на зоолошката градина ги прекршило законските обврски и самостојно доставило примерок до Факултетот за ветеринарна медицина кој бил примен на обработка на 15.10.2024 година.
„На 18.10.2024 год., за жал на сите нас, е добиен наод со кој е потврден случај на присуство на вирусот на авијарна инфлуенца – птичји грип, сој Х5Н1 кај гуска. И покрај ваквата информација, повторно ЗОО Скопје, не почитувајќи ги законските прописи, не ја извести АХВ на законски пропишаниот начин, односно постапила спротивно на член 4 од Правилникот за мерки за сузбивање и искоренување на болеста авијарна инфлуенца бр. 161/2016, односно секое присуство или сомнеж на авијарна инфлуенца се пријавува веднаш, односно во што е можно пократок рок до АХВ“,
се наведува во соопштението на Агенцијата.
Од АХВ нагласуваат дека ветеринарната дејност од јавен интерес на територијата на Република Македонија ја спроведува државна ветеринарна служба во соработка со други органи и институции, преку Агенцијата, директорот и референтна лабораторија која работи за потребите на Агенцијата врз основа на договор.
„На 19.10.2024 год. надлежниот официјален ветеринар од АХВ заедно со раководителот на СЗЗБЖ, овластен од страна на в.д. директорот д-р Оливер Миланов, извршил вонреден инспекциски надзор во ЗОО Скопје. Притоа, во одгледувалиштето на ЗОО Скопје официјалниот ветеринар донесе забрана за влез на посетители, забрана на пристап до езерцето во кое била пронајдена угинатата птица со исклучок на тројца вработени кои со полна заштитна опрема вршеа убивање и манипулација со птиците. Земање, пакување и испраќање на примероци за лабораториски тестирања согласно дијагностичкиот протокол од Правилникот за мерки за сузбивање и искоренување на болеста авијарна инфлуенца. Чистење и дезинфекција на просторот околу езерцето во која зона се движат овој вид на птици. Забрана за движење на живина и други птици во и од одгледувалиштето. Се задолжи надлежната ветеринарна служба задолжително да врши пријавување на промени на здравствената состојба на живината и дивите птици до надлежниот официјален ветеринар и примена на биосигурностните мерки при спроведување на сите активности“,
соопштија од АХВ.
Дополнително, се посочува во соопштението, официјалниот ветеринар при вршењето на своите задачи може да побара асистенција од овластено лице од Министерството за внатрешни работи.
„За жал, побарана е асистенција поради присуство на лице кое се претставило дека е вработен во градската администрација и ја попречуваше работата на инспекциските служби и за ова дело МВР има записник. Но, мора да им се заблогадариме на вработените лица во ЗОО Скопје кои несебично ни дадоа полна поддршка и зедоа активно учество во спроведување на наредените мерки“,
соопштија од АХВ.
Од Агенцијата потенцираат дека сомнежите во јавноста и споделените видеа за начинот на собирање и отстранување на затекнатата живина во одгледувалиштето се во целост со почитување на протоколите за сузбивање и искоренување на авијарна инфлуенца и Законот за благосостојба на животните и меѓународните протоколи и додаваат дека не е во ред да бидат коментирани од лица кои не се компетентни за тоа.