Првиот човек на ДУИ изјавата ја даде на новинарски прашања по средбата со претседателот на Албанија, Бајрам Бегај. Притоа повторно ја нападна коалицијата ВЛЕН дека се однесува вазалски во владата на Христијан Мицкоски
Во неколку јавни настапи во изминатите денови, Арбен Таравари, кој е еден од лидерите на ВЛЕН, беше критичен кон работата на коалицијата чиј дел е. Во настап на „360 степени“ кажа дека проблемот не е во Христијан Мицкоски, туку што координацијата за сите прашања кои се однесуваат на ВЛЕН траат многу долго додека се постигне консензус и потоа да се донесе одлука. Стави под прашање и одредени кадри на директорските, па и на министерските позиции
Претседателот на ДУИ, Али Ахмети, по денешната средба со претседателот на Република Албанија, Бајрам Бегај, одговарајќи на новинарско прашење кажа дека не е точно оти има некаков договор со министерот за здравство и коалициски партнер на ВЛЕН, Арбен Таравари.
„Со Арбен Таравари нема договор, тоа е нивна внатрешна работа. Сами одлучуваат за својата иднина, дали сакаат да бидат сервис и слуга на оние што ги газат правата на Албанците. Нека останат таму каде што се. Јас им упатив јавна покана на ВЛЕН да ги напуштат институциите затоа што ние не сме резервна гума, да си одат тие и да ги замениме ние. ДУИ не може да се користи како сервис во рацете на Христијан Мицкоски или во рацете на секој што мисли Албанците да ги претвори во вазал. Ако некој е регрутиран и ако некој е навикнат да биде нечиј вазал, ДУИ не доаѓа од телевизиските екрани како политичка сила, туку произлезе од една војна и отпор за изедначување на Албанците во својата земја“,
изјави Али Ахмети, претседател на ДУИ.
Ахмети додаде дека албанското прашање во државава е деградирано и дека сограѓаните Македонци не треба да се гордеат што успеаја да ги победат Албанците институционално.
„Јас можам да зборувам затоа што гледам дека албанскато прашање е деградирано и дека албанското мислење во Македонија е дека Албанците се во иста ситуација како пред 2001 година. И ова не сакам да го слушнам од Албанците бидејќи ова е многу ризично. Многу е разочарувачки како се одвивале досега работите. Јас гледам тоа што гледам, односно Албанците изгубија важни позиции во државата и нашите сограѓани Македонци не треба да се гордеат што успеаја да ги победат Албанците институционално, затоа што секој пораз на Албанците институционално предизвикува нови ситуации во држава. Албанците не се кираџии во својата земја, туку живеат во својата земја и сакаат да владеат заедно со нивните сограѓани Македонци. Оваа држава не е туѓа. И наша е. Не дозволуваме да газат по достигнувањата на Албанците, не дозволуваме да се замати Охридскиот договор, не дозволуваме крвта на нашите браќа да оди залудна. Крвта што беше пролеана беше пролеана за еднаквост на Албанците во нивната земја”,
изјави Али Ахмети.
Средбата на Бегај и Ахмети се случи во Скопје, кој се враќаше од Софија каде што се одржа безбедносен форум за Балканот, кој е под покровителство на бугарскиот претседател Румен Радев и кралот на Јордан, Абдула II. Според фејсбук-профилот на Бегај, албанскиот претседател се сретнал и со делегација на ДУИ, но и со претставници на ВЛЕН. Можеби е и само случајност, но на една фотографија Бегај е фотографиран со вицепремиерот Изет Меџити и собранискиот спикер Африм Гаши, кои се двајца од четирите лидери на ВЛЕН. Средбата на албанскиот претседател со Арбен Таравари се чини дека е остварена засебно.
Шпекулациите за можно партнерство помеѓу опозициската ДУИ и Арбен Таравари, кој е дел од власта како еден од лидерите на ВЛЕН, се појавија последниве недели. Неофицијално, меѓу партнерите има несогласувања за заедничкиот настап на претстојните локални избори – кој да добие колкав колач на листите, ако тие се заеднички.
Во гостувањето во „360 степени“ Арбен Таравари кажа дека се преговара, но не потврди дека тензиите се со таков интензитет како што се зборува во јавноста. Но, од друга страна, искажа директни критики кон коалицијата ВЛЕН – дека тешко и тромо функционира, дека имаат поставено лоши кадри, дека дозволуваат да се занимаваат со симболични прашања, што не им остава време за да се покажат на суштински теми. Прашан дали е во преговори со ДУИ, тој кажа дека има контакти со партијата предводена од Али Ахмети, но дека е во рангот на контактите кои ги имаат и другите партии што се дел од ВЛЕН.
Веќе следниот ден, партнерите негираа дека имаат какви било контакти со ДУИ.