Во Основниот кривичен суд во Скопје денеска треба да продолжи повтореното судење за случајот „Монструм“ за петкратното убиство кај Смилковско Езеро во 2012 година.
Според најавите од рочиштето во средата, предвидено е денеска да сведочат лидерот на ДУИ, Али Ахмети и вицепремиерот Бујар Османи и обвинителот Џелал Бајрами, кој е и поранешен министер за труд и социјална политика и заменик-министер во МВР.
Во средата сè уште беше неизвесно дали Османи има уредно примена покана.
На минатото рочиште сведочеа ексминистерката за внатрешни работи, Гордана Јанкулоска и поранешниот директор на БЈБ, Љупчо Тодоровски, познат како Радникот. Во судот се појави и Синиша Алексовски, но, бидејќи претходните двајца сведоци се задржаа до речиси 16 часот, неговото сведочење се помести за 27 февруари. Претходно, сведочеше и експремиерот Зоран Заев.
Обвинението за „Монструм“ го застапуваат обвинителите Фатиме Фетаи и Гаврил Бубевски, додека судењето го водат судиите Огнен Ставрев и Осман Шабани.
За петкратното убиство на 12 април 2012 година, кога беа убиени момчињата Кире Тричковски, Филип Славковски, Цветанчо Ацковски, Александар Наќевски и рибарот Борче Стефановски, во претходна судска постапка на доживотен затвор за тероризам беа осудени Алил Демири, Африм и Агим Исмаиловиќ, Фејзи и Хаки Азири и Сами Љута.
Врховниот суд во декември 2017 година ги укина пресудите, ги ослободи од притвор осудените Агим Исмаиловиќ, Хаќи Азири, Сами Љута и Фејзи Азири и им определи мерки на претпазливост. Алил Демири и Африм Исмаиловиќ, се во бегство и се наоѓаат во Косово, а нивната екстрадиција со години не се реализира. По укинувањето на пресудите, случајот „Монструм“ го презеде СЈО и предметот беше вратен на повторно судење.