Во оваа смисла, лидерот на ДУИ рече дека со освоени 114 000 гласа на локалните избори, коалицијата „Национална алијанса за интеграција“ предводена од ДУИ е победник од партиите на Албанците, наспроти коалицијата ВЛЕН со освоени 91 000 гласови
Не изгубив на изборите за да се повлечам од политиката – порача лидерот на Демократската унија за интеграција (ДУИ), Али Ахмети, по денешното Централно претседателство на партијата во чиј фокус беа локалните избори.
Тој ова го кажа на прес-конференцијата по седницата на партиското тело на ДУИ, прашан дали ќе се повлече од политиката, откако такви наводи беа објавени во дел од медиумите.
Во оваа смисла, Ахмети рече дека со освоени 114 000 гласа на локалните избори и 159 советници, ДУИ е победник од партиите на Албанците, наспроти коалицијата ВЛЕН со освоени 91 000 гласови и 122 советника.
„Зошто да се повлечам од политиката? Еве ги резултатите. Ако може да најдете дали за 25 години Али Ахмети има еден пораз, тогаш ќе се повлечам. Дваесет и пет години победувавме, не само последниве три циклуси. На овие избори, како на ланските, имаме синдром на Газиместан, поразените излегуваат победници. ВЛЕН и на претходните два циклуси парламентарни и претседателски, од поразени излегоа победници. Дали е победник тој што има 159 или 122 советници?“,
рече Ахмети.
Во однос на изборите резутлати во Тетово и во Струга, каде што кандидатите за градоначалници од коалицијата „Национална алијанса за интеграција“ предводена од ДУИ одат во вториот изборен круг, Ахмети вели дека на 2 ноември играта почнува одново, од нула. За изборниот епилог во Чаир и Сарај, пак, каде што кандидатите на НАИ загубија уште во првиот круг, Ахмети вели дека во битките постојат и порази.
На прашањето дали има ќе има соработка со други политички партии во вториот изборен круг, Ахмети вели дека се отворени да комуницираат со сите за доброто на граѓаните.
Во обраќањето пред медиумите по состанокот на Централното претседателство на ДУИ, партискиот лидер ги искритикува политичките партии, велејќи дека воделе кампањи со националистички карактер. Го спомена слоганот „Македонија повторно твоја“, кој беше доминантен во кампањата на ВМРО-ДПМНЕ за минатогодишните парламентарни избори, велејќи дека со него се алудира оти државата е само на Македонците.
„Ние се залагаме и ќе се залагаме, со најголема искреност за европска Македонија, добри меѓуетнички односи, нула проблеми со соседите, така сметаме дека ѝ служиме на иднината, не на минатото“,
порача Ахмети.