Прес-конференцијата која се одржа денеска во штабот на ДУИ во Мала Речица траеше нешто повеќе од шест минути. Говорници беа претседателот на ДУИ, Али Ахмети, и министерот за транспорт и врски на Косово, Либурн Алиу
Иако јавноста чекаше реакција од претседателот на ДУИ, Али Ахмети, за контроверзните моменти од гостувањето на косовскиот премиер Курти во Скопје и во Тетово, настани што речиси една недела ја брануваат македонската јавност, Ахмети на денешната прес-конференција воопшто не ги спомна настаните, ниту, пак, беше дозволено да се постават прашања по завршувањето на пресот.
Ахмети речиси четири минути говореше за потребата од изградба на пат од Тетово до Призрен, кој би бил од огромен интерес за двете земји, со што ќе се инвестира во мирот, стабилноста и сигурната иднина на регионот кој пред 20 години бил во немир и војни.
„Пристапот кој денеска го имаме е придобивка за сите наши земји, но да биде успешен овој ангажман, во рамките на оваа посета имавме посебно внимание кон изградбата на патот меѓу Тетово и призрен кој би бил од голема економска придобивка за двете земји, затоа што патиштата овозможуваат проток, кој овозможува погоема економија“,
рече Ахмети.
Ахмети кажа дека го примил министерот Алиу на барање на Курти и кажа дека проектирањето треба да се заврши што е можно побрзо, за да може да започне изградбата. Косовскиот министер кажа дека од нивна страна се работи со побрзо темпо и дека се во фаза на постигнување финансиски договор за проектирање на заеднички тунел.
Денешната посета на косовски министер доаѓа само неколку дена по посетата на косовскиот премиер Албин Курти на Скопје и Тетово, каде што тој се сретна само со претставници од албанската опозиција. Средбите во Тетово и во Скопје предизвикаа револт и реакции кај македонската јавност, но и кај државниот врв бидејќи не беше интонирана македонската химна, ниту, пак, беше истакнато македонското знаме – напротив, во Тетово се вееше знаме со т.н. „голема Албанија“, па домаќините на средбите, градоначалниците на Чаир и на Тетово, Висар Ганиу и Биљал Касами, вчера добија прекршочни пријави од Министерството за внатрешни работи.