Родители и блиски на загинатите во „Пулс“ на денешниот протест носеа транспаренти на кои беше прикажана таа како со куфери со пари е во светот на покојните, а до неа стои митска персонификација на ѓавол или ангел на смртта, кој според написот на транспарентот ѝ вели: „Пари овде не ти се потребни“
Адвокатката Ивана Коцевска, која е бранител на сопственикот на т.н. кабаре „Пулс“, Дејан Јованов-Деко, и на неговиот син Михајло Јованов во судскиот процес за трагичниот пожар во Кочани, ги повика надлежните институции да реагираат поради злоупотреба на нејзиниот лик на денешниот „Марш за ангелите“.
Имено, родители и блиски на загинатите во пожарот на протестот носеа транспаренти на кои беше прикажана таа како со куфери со пари е во светот на покојните, а до неа стои митска персонификација на ѓавол или ангел на смртта, кој според написот на транспарентот ѝ вели: „Пари овде не ти се потребни“.
Коцевска во реакцијата вели дека како бранител на дел од обвинитетите во кривичноправниот предмет за трагичниот настан во Кочани досега се воздржувала од секакви напади во име на емпатичноста и сочувството со болката на родителите на починатите, но денешниот настан веќе не ѝ остава простор за воздржаност.
Според неа, револтот на родителите бил поради кривичната постапка постапка што таа ја покренала против непознати лица кои ден по пожарот во „Пулс“ го демолираа кафулето „Класик“ во трговскиот центар во Кочани, сопственост на еден од нејзините клиенти.
„Откако јавно се изложи револт за мојата покрената кривична постапка за вандализмот што се случи на 17.03.2025 г. од одредени НН лица кои родителите ги оправдуваат, а согласно законот се подложни на одговорност, повеќе немам простор да се воздржувам“,
вели адвокатката во реакцијата.
Таа наведува дека родителите си дозволиле да организираат протест на кој нејзиниот лик е злоупотребен преку монтажа во „фотошоп“ и прикажан во небулозна форма која го нарушува не само нејзиниот, туку и угледот на секој адвокат.
„И за ова треба и апелирам да реагираат сите надлежни органи на РМ во заштита на нашата професионална должност пред сè, а потоа и во насока на заштита на нашиот интегритет и достоинство како носители на правната заштита и владеење на правото“,
вели Коцевска.
На „Маршот за ангелите“ што се одржа по 36. пат родителите и блиските на загинатите во „Пулс“ им одадоа поддршка на лицата против кои синот на сопственикот на „Пулс“ поднесе тужба поради демолирањето на кафулето „Класик“ во трговскиот центар во градот, еден ден по трагичниот пожар. Тој бара од тужените отштета од 1,2 милиони денари или околу 20 000 евра.
Инаку, на рочиштата од судскиот процес за трагичниот пожар што се одржуваат во судницата во Идризово често можат да се слушнат негодувања и забелешки на родителите упатени кон обвинетите и нивните бранители, особено кон адвокатите што доаѓаат од Кочани.