Министерката за внатрешна безбедност Кристи Ноем соопшти дека администрацијата го поништила сертификатот на „Харвард“ за програмата за размена на студенти како резултат на непочитување на законот
Универзитетот го оцени потегот за незаконски, наведувајќи дека останува посветен во зачувување на можноста за запишување на странски студенти и научници кои доаѓаат од повеќе од 140 земји од светот
Администрацијата на американскиот претседател Доналд Трамп ја укина можноста универзитот „Харвард“ да запишува меѓународни студенти, што претставува најостра ескалација во спорот меѓу Белата куќа и реномираниот универзитет во САД.
„’Харвард’ повеќе не може да запишува странски студенти, а постојните странски студенти мора да се префрлат или ќе го изгубат својот правен статус“,
соопшти Министерството за внатрешна безбедност на САД.
Министерката за внатрешна безбедност Кристи Ноем соопшти дека администрацијата го поништила сертификатот на „Харвард“ за програмата за размена на студенти како резултат на непочитување на законот.
„Нека ова послужи како предупредување за сите универзитети и академски институции низ целата земја“,
напиша американската министерка во објава на социјалните мрежи.
Универзитетот го оцени потегот за незаконски, наведувајќи дека останува посветен во зачувување на можноста за запишување на странски студенти и научници кои доаѓаат од повеќе од 140 земји од светот. Во соопштението на „Харвард“ се додава дека ваквата одлука може да резултира со сериозна штета врз академската заедница, но и академската и истражувачката мисија на универзитетот.
Одлуката на администрацијата на Трамп би можела да влијае на илјадници меѓународни студенти кои студираат на „Харвард“. Минатата академска година на реномираниот универзитет биле запишани речиси 7 000 странски студенти, што е 27,2 отсто од вкупно запишаните.
Белата куќа претходно побара „Харвард“ да направи промени во практиките за вработување, прием и настава за да помогне во борбата против антисемитизмот на кампусот. Од универзитетот, пак, соопштија дека преземале многу чекори за справување со антисемитизмот и дека барањата се обид за регулирање на интелектуалните услови.