Во однос на забелешката на премиерот дека ВМРО-ДПМНЕ чекаше редовни парламентарни избори по победата на локалните во 2021 година, Арбер Адеми вели дека контекстот е различен
Со изјавите дека нема да има предвремени парламентарни избори, свесен дека ВЛЕН ќе претрпи пораз на локалните избори, премиерот сака да прати порака до „клиентелистички кругови“ дека ВЛЕН ќе остане во Владата, вели Арбер Адеми, потпретседател на ДУИ, дел од коалицијата „Национална алијанса за интеграција’ (НАИ) во интервју за „360 степени“ на МРТ 1.
„Сака да прати некоја порака до некои клиентелистички кругови со намера да им каже – еј, внимавајте, вие нема да гласате за ВЛЕН, но ВЛЕН ќе продолжи да биде со мене во Владата. Пак ќе имате работа со мене. Тоа е закана до некои клиентелистички кругови, свесен за големиот пораз што ќе го претрпи ВЛЕН“,
вели Адеми.
Во однос на забелешката на премиерот дека ВМРО-ДПМНЕ победи на локалните избори во 2021 г., но чекаше редовни парламентарни, Адеми вели дека сега контекстот е друг.
„Има една голема разлика околу контекстот. Во 2020 г. премиерот Мицкоски ги изгуби изборите, парламентарните. И затоа победата во 2021 г. не значеше ништо друго освен победа на локални избори. Но, во 2024 г. ДУИ победи на изборите. И се газеше легитимитетот, се газеше и амандманот 6 од Уставот. Оваа влада ниту е легална, ниту е легитимна. Ако го анализираме амандман 6 и заклучокот на Пол Вилијамс, авторот на Охридскиот мировен договор, каде што вели дека правична и соодветна застапеност на сите заедници не значи само имплементирање на овој принцип при вработување, туку и при процесот на носење одлуки, особено на органи кои произлегуваат од волјата на граѓаните. Така што, сосема е друг контекстот од 2021 г.“,
одговара Адеми од НАИ.
На забелешката дека Владата има мнозинство во Собранието и може да продолжи да функционира, поранешниот вицепремиер, министер за образование и пратеник вели – ситуацијата ќе биде неодржлива.
Прашан што ќе промени ДУИ ако е внатре во Владата, Адеми одговара дека се потценува улогата на партијата од којашто доаѓа.
„Тогаш имаме проблем околу поимањето на улогата на ДУИ. ДУИ се вложуваше за добри меѓуетнички односи, за добри меѓусоседски односи, за членство во НАТО, за отпочнување на преговорите со ЕУ“,
одговори тој.
Според него, воопшто не можеше да се формира влада доколку не се почитуваа црвените линии на ДУИ, а меѓу нив се почитување на Охридскиот мировен договор, Преспанскиот договор, Договорот за добрососедство и уставните измени.
„Овие избори се референдум, општонароден референдум за да им се одговори на овие етнички провокации и политики кои се од минатото, кои се од 80-те, 90-те години, кога Милошевиќ без легитимитетот на Албанците ги стави Раман Морина, Синан Хасани, Али Шукрија како претставници на Албанците“,
изјави Арбер Адеми во интервјуто.