До овие моменти немам никакво известување дека пратеничката група се намалила или пораснала, вели координаторот Адеми откако Изет Меџити и Мерита Коџаџику најавија дека ја напуштаат ДУИ и дека на 13 август ќе го официјализираат новото политичко движење
Адеми вели дека уставните измени имаат приоритет во партијата и тие се подготвени да ја напуштат Владата и да се откажат од други унапредувања кои би ѝ припаднале на оваа партија
Пратеничката група на ДУИ формално сѐ уште има 15 пратеници бидејќи Изет Меџити и Мерита Коџаџику немаат најавено дека заминуваат, вели пратеникот и координатор на пратеничката група Арбр Адеми.
„Нашата пратеничка група броеше 15 пратеници, но формално сѐ уште брои, од причина што како координатор на пратеничката група сè уште немам формална одлука за отцепување на пратеници од пратеничката група. До овие моменти немам никакво известување дека пратеничката група се намалила или пораснала“,
рече Адеми за летното издание на „Клик плус“ на ТВ 21.
За заминувањето на Изет Меџити од партијата и најавата дека на 13 август ќе се официјализира формирањето ново политичко движење, Адеми тврди дека тие разбрале од медиумите. Адеми, како што кажа, жали за одлуката на Меџити да ја напушти партијата и додава дека според него, тој бил добро третиран од ДУИ и од Ахмети.
„Од медиумите сме информирани за новата политичка определба, во овој случај сакам да нагласам дека се работи за значајни личности кои имале високи политички и партиски функции и биле третирани многу добро во ДУИ“,
додаде Адеми.
На прашањето дали ДУИ се плаши од политичкото движење на Изет Меџити, Адеми одговори со „не“ велејќи дека тоа е добро организирана, етаблирана политичка организација, која не еднаш, туку повеќепати поминала низ слични процеси.
Адеми вели дека Демократската унија за интеграција е во своите најдобри денови и е на највисоко ниво по кредибилитет во јавното мислење, а тоа е благодарение на визијата на Али Ахмети, која 22 години прави ДУИ да биде стабилна партија.
За уставните измени, кои веќе на 18 август ќе бидат на пленарна седница во Собрание, Адеми вели дека не разговарале поединечно со пратениците од опозицијата, но дека не е добро да се условува.
„Не прифаќаме нови услови, а ВМРО-ДПМНЕ не треба да зборува за предвремени избори, туку за идни генерации и перспективи“,
додава тој.
Адеми вели дека уставните измени имаат приоритет во партијата и тие се подготвени да ја напуштат Владата и да се откажат од други унапредувања кои би и припаднале на оваа партија.
„Само гласајте ги уставните амандмани, нека стапат во сила уставните амандмани и ја ослободуваме Владата без никакви дополнителни, политички, партиски барања кои се наследени од сегашната. Ништо не сакаме“,
рече Адеми.
Координаторот на пратеничката група на ДУИ вели дека како партија не се плашат од опозицискиот фронт затоа што, како што вели Адеми, политичката сцена во земјава има многу актери, но само еден фактор, а тој, според него, е Али Ахмети.
„Кога зборуваме за постоечките опозициски партии Беса и Алтернатива, би рекол дека има многу политички актери на политичката сцена во Република Северна Македонија, но факторот е еден и единствен, тој е Али Ахмети“,
рече Адеми.
Апсењето на Исмет Гури пред два дена, Адеми вели дека нема врска со политичките случувања и дека Али Ахмети не се занимава со, како што рече, „стапици“.