Авганистанските бегалци кои треба да ги прифати С Македонија се луѓе кои се вработени во меѓународнни организации и целта е ние да им пружиме привремено згрижување се додека не ги добијат специјалните мигрантски визи за во САД, вели Едмонд Адеми, советник за надворешна политика во Владата.
Тој во изјава за ТВ Сител појасни дека согласно Законот за странци, земјава ќе им издава виза за престој до 90 дена.
„Имаме воспоставено систем, преку кој добиваме листа со имиња и податоци за авганистанските бегалци, кои потоа се проверуваат во МВР и АНБ и не треба да се грижиме за безбедносен ризик. Сите овие луѓе ќе бидат процесуирани кон САД или трети земји. Тие веќе работат за реномирани меѓународни организации и фирми, а ние привремено ќе ги згрижиме додека им се извадат специјални мигрантски визи за во САД. Кај нас, согласно Законот за странци, ќе им се издава виза за престој до 90 дена“,
вели Адеми.
Според него, амбицијата на овие бегалци е да продолжат да работат за фирмите за коишто досега работеле и затоа вели дека нема потреба од лажни вести дека за нив ќе се отвораат работни места. Адеми дополни дека голем дел од бегалците кои ги очекуваме се вакцинирани против ковид-19, околу 80 отсто.
„Станува збор за околу 650 лица кои се членови на семејства на вработени во Националниот демократски институт, Отворено општество, Обединетите нации, но и новинари интелектуалци и експерти од Би-Би-Си, Њујоркер, Фридом Хаус, како и студенти на меѓународни универзитети“,
рече Адеми.