АДА е достапен 24/7 и е на три јазици: македонски, албански и англиски. Тој е креиран од страна на домашната стартап-компанија „Кодвел“, од каде што функционирањето на асистентот го објаснија со зборовите: „Замислете да имате пристап до најдобриот шалтерски работник, кој ви е достапен 24/7 за комуникација преку популарните чет-апликации (Фејсбук, Месинџер и Вибер) и кој може да ви помогне со сè што ви е од интерес, а е поврзано со соодветната институција“
Од денеска Владата има нов асистент на располагање во јавниот сектор. Станува збор за дигитален асистент кој е базиран на вештачка интелигенција, наречен АДА.
Ова е прв ваков асистент во јавниот сектор во земјите од регионот и пошироко.
Преку него граѓаните и компаниите ќе може да добијат целосни информации за условите за инвестирање во Северна Македонија, како и за државната помош која се нуди за инвестициите.
„Преку дигиталниот асистент, граѓаните и заинтересираните странски инвеститори ќе можат да се запознаат со достапните програми и отворени повици на институциите кои се јавуваат како даватели на државна помош, и гарантира голема транспарентност, ефикасно и ефективно добивање на податоци за бизнисот во реално време 24/7 на три јазици, македонски, албански и на англиски на интернет адресата: ada.gov.mk“,
велат од Владата.
На денешното „лансирање“ на дигиталниот асистент, премиерот Димитар Ковачевски оцени дека е надградба на практиките за дигитализација во општеството што ги има Владата.
„Нашата држава ги следи светските процеси и веќе е дел од бранот на нови, модерни, дигитални трендови, кои го зафаќаат секој аспект на нашето живеење и наједноставно може да се каже дека да, доаѓа АДА, што е првиот дигитален асистент некогаш направен во Владата на нашата држава. Процесот на дигитализација е незапирлив, секаде во светот, па така и во нашата држава. Како Влада, која е насочена кон осовременување и следење на светските трендови, во изминатиот период поддржавме, а и ќе продолжиме да поддржуваме поголем број на иновативни иницијативи“,
изјави премиерот Ковачевски.
Дигитализацијата ќе помогне во борба против корупцијата, а од тие заложби, според вицепремиерот Фатмир Битиќи, произлегува и идејата за АДА.
„Каков резлутат е АДА, од каде произлезе? Имаше две клучни работи пред две години кога ја почнавме дискусијата за АДА. Првото беше извештајот на Стејт департментот кој тогаш излезе за борбата со корупција. Во сегментот за борба против корупција имаше еден дел кој се однесуваше на делењето на државната помош и поддршка на инвестиции, и во истиот стоеше дека транспарентноста е клучна за сузбивање на појавата на корупција и дека елиминацијата на истата ќе биде императив и треба да биде императив на Владата. И денеска, нормално, одговорот го најдовме во дигиталниот асистент базиран на вештачка интелигенција, АДА“,
рече Битиќи.
Вториот момент, рече тој, за него бил личен бидејќи како претседавач на советот за стартап-екосистемот, предизвик било да им се помогне на домашните компании да покажат што знаат.
Резултатот, нагласи Битиќи, е АДА, дигитален асистент креиран од домашната стартап-компанија „Кодвел“.
Нино Карас, еден од коосновачите на „Кодвел“ која ја изработи АДА, рече дека дигиталниот асистент овозможува креирање на дигитални вработени кои се експерти на затворен домен на знаење и автоматизираат комуникација со крајни корисници.
„Ваквите дигитални асистенти се во можност да обезбедат природна комуникација со крајните корисници преку ’чет‘ каналите налик на комуникација со реален човек, достапни се во секое време и ги услужуваат корисниците на нивниот мајчин јазик. Напросто, замислете да имате пристап до најдобриот шалтерски работник, кој Ви е достапен 24×7 за комуникација преку популарните чет апликации (Фејсбук, Месинџер и Вибер) и кој може да ви помогне со сè што ви е од интерес, а е поврзано со соодветната институција“,
изјави Карас.
Компанијата „Кодвел“ на објавениот јавен повик, потенцираат од Владата, била оценета во конкуренција на три проекти како најиновативната идеја за дигитален AI-асистент, за чија реализација државата преку Фондот за иновации и технолошки развој обезбеди девет милиони денари од буџетот на ФИТР.