Од партијата Алијанса за Албанците (АА) денеска излегоа со став по повод прославата на 20 години од потпишување на Рамковниот договор, која е наречена „по Охрид“. Тие велат дека ниту еден од столбовите на овој договор не е заокружен и дека прославата е само скапа предизборна забава на партиите на власт.
„Денес сме тука за да ја разоткриеме големата измама и злоупотреба на Охридскиот договор и кон сите тие што придонесоа жртвувајќи го и својот живот за овој договор. Тие што ја имаа најголемата обврска да го имплементираат договорот во овие две децении, денес организираат скапи прослави и забави за да го покријат нивниот дводецениски неуспех. По дваесет години, Охридскиот договор продолжува да биде тема на дискусија и ниту еден од столбовите на овој договор не е заокружен“,
велат од Алијанса.
Оттаму додаваат дека сѐ уште не се исполнети обврските од договорот, како што се правична застапеност, социјална и економска еднаквост, уставна еднаквост на граѓаните во земјата, квалитетно образование, ресоцијализација на учесниците во конфликтот, реална децентрализација, нефунксионалноста на Бадентеровиот систем, меѓуетничките односи и европската интеграција.
„За да биде иронијата уште поголема, денес се трошат 500 илјади евра за организирање прослава, предизборна забава на партиите на власт, додека тие што беа најзаслужни, семејствата на загинатите борци и учесниците во војната во 2001 година, се борат за опстанок, со неизлечени рани и многу од нив коишто заминаа надвор од државата“
нагласуваат од партијата.
Од Алијанса велат дека денес за војната и за Охридскиот договор говорат луѓе како Артан Груби, кој, како што велат, нема ниту еден најмал придонес за овој процес, туку само постојано профитира газејќи по придонесот на сите други актери кои на различни начини инвестирале и се жртвувале.
„Ги повикуваме него и ДУИ да не манипулираат со крвта и жртвувањето на војниците и сите останати што придонесоа. Да, придобивките од Охридскиот договор се поголеми од петстотините илјади евра што се трошат за вашата партиска забава, но јавно ве прашуваме – кои се придобивките од оваа забава? Немојте да манипулирате, парите не се трошат за Охридскиот договор, туку за прослави и за предизборна кампања злоупотребувајќи го овој документ“,
се вели на рајот во соопштението на Алијанса за Албанците.