Ова, пишува „Еурактив“, е добра вест за Албанија во нејзините напори за исполнување на барањата за напредок на европскиот пат, но е назадување за С Македонија која уште еднаш не успеа да направи одлучувачки чекор во пристапувањето кон Унијата
Патот на Албанија за пристапување во Европската Унија ќе биде одвоен од Северна Македонија, а првиот преговарачки кластер официјално ќе биде отворен на 15 октомври, едногласно одлучија амбасадорите на земјите членки на ЕУ, пишува паневропската новинската мрежа специјализирана за европски прашања „Еурактив“.
Медиумот потсетува дека патот на двете земји од Западен Балкан за пристапување во Европската Унија беше споен и дека двете заедно ги започнаа преговорите за членство во јули 2022 година.
Според последната одлука на ЕУ, Албанија следниот чекор треба да го направи на меѓувладината конференција во октомври со отворањето на првиот кластер „Темелни вредности“ кој вклучува неколку поглавја – јавни набавки, статистика, судство и основни права, правда, слобода и безбедност и финансиска контрола.
Ова, пишува „Еурактив“, е добра вест за Албанија во нејзините напори за исполнување на барањата за напредок на европскиот пат, но е назадување за С Македонија која уште еднаш не успеа да направи одлучувачки чекор во пристапувањето кон Унијата.
„По години фрустрација, Бугарија и Северна Македонија, под француското претседателство со ЕУ во јули 2022 година, се согласија за промена на Уставот на С Македонија за вклучување на бугарското малцинство заедно со другите малцинства споменати како ‘турски народ, влашки народ, српски народ, ромски народ, бошњачки народ и други’. Со тоа Софија би го укинала ветото за напредок на преговорите на Скопје. Сепак, договорот не е имплементиран поради недостаток на политичка волја и консензус во Северна Македонија. Во моментов 100 000 македонски државјани имаат бугарско државјанство, што значи дека го докажале своето бугарско потекло“,
пишува „Еурактив“.
По изборите во мај годинава, на кои победи ВМРО-ДПМНЕ, владата на Христијан Мицкоски стави до знаење дека сака да го репреговара т.н. „француски предлог“, што, како што потсетува „Еурактив“, наиде на отфрлање од ЕУ која предупреди дека следниот чекор ќе биде одвојување на С Македонија и Албанија од патот кон ЕУ.
„По мајските избори, С Македонија се соочи со своите соседи Грција и Бугарија, членки на ЕУ. Прво, новата претседателка Гордана Сиљановска-Давкова предизвика реакции кај Грција со тоа што не го употреби уставното име ‘Северна Македонија’ за време на нејзиниот инаугурациски говор. Земјата ја додаде додавката ‘северна’ во своето име во 2018 година за да го прекине долгогодишниот спор со Грција, по историскиот договор од Преспа. Неодамна, пак, владата на Мицкоски влезе во конфликт со официјална Софија под изговор дека протоколот на бугарскиот претседател Румен Радев не го поставил македонското знаме при неодамнешната посета на Сиљановска-Давкова на Бугарија“,
се додава во статијата на медиумот.
И покрај тоа што посетата на македонската претседателка на Софија беше неофицијална, што протоколарно не предвидува поставување на знамето во таква пригода, како што оценува „Еурактив“, сепак, таа ги заостри односите меѓу двете земји, по што бугарскиот претседател извести дека скандалот го организирале моќни сили кои не сакаат С Македонија да стане дел од ЕУ.