Алијанса за Албанците, движењето Беса и Алтернатива преговараат за можна предизборна коалиција за вонредните парламентарни избори на 12 април, соопшти денеска портпаролот на Алијанса за Албанците, Флакрон Беџети.
Целта е, како што рече, поуверлив исход на изборите.
„Ние како Алијанса за Албанците сме заинтересирани за предизборната коалициија со Беса и Алтернатива. Подготвени сме со нашите капацитети, меѓутоа сакаме победата да биде уште посилна, така што сме отворени и подготвени да соработуваме со Алтернатива и со Беса. Разговараме со двете партии, има желба и се надеваме дека заеднички ќе успееме за една предизборна коалиција која дефинитивно ќе ја победи ДУИ и ќе го има легитимитетот на гласачите Албанци“, рече Беџети на прес-конференцијата во Тетово.
Тој истакна дека вакви предизборни преговори не се водат со ниту една партија од македонскиот политички блок, а постоизборно, како што рече, ќе одлучат граѓаните.
„Сега засега нема такви преговори. За тоа ќе одлучат граѓаните кој со кого ќе коалицира. Усогласувањето на политичките програми ќе се види по 12 април и ќе се види со кого ќе се коалицира“, истакна портпаролот на партијата на Зијадин Села.