Нова влада со стари, истрошени, компромитирани и транзициски кадри. Кадрите се исти и стари, но и ветувањата се стари и истите оние што не ги исполнија, рече лидерот на опозициската ВМРО-ДПМНЕ, Христијан Мицкоски, на денешнта прес-конференција на која го кажа својот став за новата влада и ги најави идните чекори на неговата партија.
„Новата влада со стари и истрошени кадри ја отсликуваат три работи: криминал, истрошеност и лаги. Затоа имаме влада на СДСМ и ДУИ која е спрега на мафија, лаги и криминал. Од двата дена собраниска седница не чувме ниту збор за тоа како ќе се надмине економската криза, како ќе се надмине и здравствената криза. Нѐ чека сиромаштија и уште посилна здравствена криза“,
рече Мицкоски.
Во однос на здравствената состојба, обвини дека состојбата со ковид кај нас е лоша не само поради менталитетот и недисциплинираното однесување на дел од граѓаните туку пред сѐ поради немањето на систем и стратегија, за што одговорноста смета дека е кај премиерот Зоран Заев.
Во однос на економијата, рече дека следуваат потешки времиња, односно дека во сериозна опасност ќе се доведе и редовната исплата на платите и тековните обврски поради зголемување на долгот на една милијарда евра за 6 месеци и буџетскиот дефицит од 520 милиони евра за 7 месеци. Новата влада ја обвини и за поткуп на изборите.
Најави дека неговата партија, освен жестока критика, ќе организира и масовни граѓани протести.
„Ако ме прашувате каква иднина нѐ чека, оваа влада нема иднина и ќе падне пред завршетокот на својот мандат на граѓански протести. И мора секој да биде свесен дека нема брзи победи против ова зло, туку долга битка за слобода и правдини и европска иднина“,
рече Мицкоски.