Владата ги прифати барањата што организаторите на „Маршот за чист воздух“ ги упатија до властите како услов за средба.
Указ за итно носење ДУП за Вардариште, Јавното обвинителство да отвори истрага за ОХИС и за палењето кабли во Скопје, измени на Законот за животна средина со кои се идентификува и уредува постапувањето со контаминирани подрачја, да се одземе концесијата на „Еуромакс“ за рудникот Иловица-Штука и да се одземе истечената концесија за експлоатација за рудникот Плавица, запирање на процедурата за усогласување на законите од областа на заштита на здравјето на луѓето, заштита на природни богатства, животна средина, заштита на културно наследство, заштита од природни и други непогоди, комунална хигиена со Законот за прекршоци и поднесување веќе изготвената апликација за прогласување на Охридско Езеро и Студенчишко Блато како водно живеалиште од меѓународно значење до Рамсарскиот секретаријат се седумте итни барања што произлегоа од минатонеделниот протест.
Во однос на указот за итно носење ДУП СИ 09 Гази Баба за Вардариште, Владата информира дека тој во моментов е на усогласување во Градот Скопје и се очекува да биде усвоен на наредната седница на Советот на Градот. Потоа, Министерството за транспорт и врски и Општина Гази Баба во најкраток можен рок ќе го разгледаат усогласениот ДУП и ќе биде усвоен најдоцна до крајот на годинава.
За барањето да се отвори истрага за ОХИС, Владата во информацијата наведува дека ги става на располагање сите доказни материјали што се прибрани од институциите со кои раководи и го повикува ЈО да го слушне гласот на граѓаните и да отвори постапка за ОХИС и за палењето кабли во Скопје.
Во однос на барањето законски да се уреди постапувањето со контаминирани подрачја, посочува дека во новите предлог-измени на Законот за животна средина предвидени се два нови члена (член 28-а и 28-б), кои директно се однесуваат на управувањето со контаминираните подрачја, а се поврзани со барањето на „Марш за чист воздух“. Предлог-измените го покриваат начинот и методологијата за идентификација на контаминираните подрачја, видот и нивоата на опасни супстанции во медиумите на животната средина како показател за контаминацијата на одредено идентификувано подрачје, и даваат насоки за дефинирање планови за управување со контаминирано подрачје.
Предлог-законот за изменување и дополнување на Законот за животна средина е на дневен ред на денешната седница на генералниот колегиум на Владата, по што ќе биде разгледан на владината седница во вторник (10 декември) и испратен на усвојување во Собранието.
За барањето да биде поднесена веќе изготвената апликација до Рамсарскиот секретаријат за прогласување на Охридско Езеро и Студенчишко Блато, како водно живеалиште од меѓународно значење, Владата наведува дека апликацијата ќе биде поднесена откако ќе бидат потпишани анексот на Студијата за валоризација за Студенчишко Блато и Договорот за Студија за ревалоризација на Охридското Езеро помеѓу ГЕФ, МЖСПП и УНЕП до крајот на 2019 година.
Владата потсетува дека одлуката за одземање на концесијата на „Еуромакс“ за рудникот Иловица-Штука е веќе донесена и по завршувањето на жалбената постапка, која е во тек во Управниот суд, таа ќе стапи во сила.
Во однос на барањето за одземање на истечената концесија за експлоатација за рудникот Плавица, Владата информира дека се обврзува да ја донесе оваа одлука најдоцна до 17 декември 2019.