Претседателот на бугарската страна во заедничката Комисија за историски прашања Ангел Димитров ги повика македонските историчари на вонредна средба која би се одржала до крајот на овој месец на која ќе се разговара за ликот и делото на Гоце Делчев. Во интервју за Бугарското национално радио, Димитров посочува дека бугарската страна и досега барала почести средби на заедничката комисија, но македонските претставници сметале дека 6 средби на годишно ниво се доволни.
„Денеска ќе ги поканам колегите на средба, на место на кое тие ќе го одберат, ако сакаат може и на некое одморалиште во Бугарија, да се сретнеме кон крајот на август за да си ја олесниме работата за во септемвери. Повеќепати сме барале нашите средби да бидат почести и поинтензивни, но нашите колеги смеатаат дека шест средби во годината се доволни“,
изјави Ангел Димитров.
Повикот за нова средба од страна на бугарските историчари доаѓа само два дена откако бугарскиот премиер Бојко Борисов по средбата со македонскиот премиер Зоран Заев побара од заедничката комисија поинтензивни средби за до октомври да се најде компромис за Гоце Делчев.
„Работите за Гоце Делчев за бугарската историска наука се јасни. Историчарите нема да кажат кој е Гоце Делчев, туку тие само можат да го потврдат или негират тоа што тој го кажал за себе, за своето семејство, за околината во која работел , за кои интереси работел за кои и загинал. Разликите по ова се фундаментални“
рече Димитров.
Претседателот на македонската делегација во комисијата Драги Георгиев смета дека за да може да се најде компромис за Делчев не треба да се инсистира на неговиот идентитет, туку да се потенцира значењето што го има Делчев за двата народа. Ист став за 360 степени изнесе и членот на Комисијата, Петар Тодоров. Тој дополнително потенцира дека поставувањето рокови е контрапродуктивно и може да го наруши духот на Договорот за пријателство меѓу двете држави.
„На овој свет мора само да се умре, а дали ќе донесеме решение до октомври ќе покаже времето. Најдобро е политичарите да не прават такви притисоци и да не ставаат рокови бидејќи тоа е само контрапродуктивно за самата дискусија, бидејќи во тие услови историчарите од двете страни работат под притисок дека мора да се постигне нешто и тогаш постои голем ризик да се донесат лоши и неквалитетни решенија, кои можат да бидат контрапродуктивни“,
порачува Тодоров.