Попустот за станови и ослободувањето од комуналии ќе важат за брачни двојки до 35 години, а најавените мерки треба да бидат регулирани со законски решенија за кои Мицкоски очекува поддршка од сите пратеници
Премиерот и лидер на владејачката ВМРО-ДПМНЕ, Христијан Мицкоски денеска најави три мерки за младите, насочени кон решавање на прашањата за домувањето и животниот стандард.
Мерките ги претстави на 35. годишна конференција на Унијата на млади сили на партијата, која се одржа под мотото „Нашата генерација – нашата Македонија“, а како што најави, истите ќе бидат регулирани со законски решенија.

Првата мерка предвидува градежните компании да издвојуваат најмалку 10 отсто од станбените единици во новите згради за брачни двојки до 35 години, по цена најмалку 20 отсто пониска од пазарната.
Според премиерот, компаниите нема да можат да добијат градежна дозвола доколку не го исполнат овој услов.
„Првата мерка којашто денеска ќе ја објавам, а којашто наскоро ќе се најде како закон пред пратениците е мерка во која ниту една градежна компанија што има намера да гради станбени единици, згради, без разлика во кој град и без разлика на кое место во Македонија, нема да може да добие дозвола за градба ако не оддели минимум 10 отсто станбена површина за брачни парови до 35 години, по цена која што ќе биде најмалку 20 отсто пониска од пазарната цена“,
рече тој во говорот на годинешната конференција на Унијата на млади сили на партијата.
Ова, како што рече, е негова порака до сите градежни компании, дека по донесувањето на овој закон нема веќе дозволи за градење, нема веќе бетонизација, туку ќе има хумано градење и домување.
„И ова ќе биде регулирано со закон. Има политички партии што се обидуваат да прават естрада дека требало од буџетот да субвенционираме еден, два отсто од каматните стапки. Не еден, два, туку минимум 20 отсто пониска цена. Ова е вистинска мерка“,
додаде премиерот.
Втората мерка се однесува на младите брачни двојки до 35 години кои ќе одлучат да градат сопствена куќа. За нив, според најавата на Мицкоски, општините нема да наплаќаат комуналии за градба, а решението би важело на целата територија на државата.
„Втората мерка за млади до 35 години е за секој оној кој ќе гради дом или своја куќа каде што ќе го гради своето семејство, преку закон повторно пред македонскиот парламент ќе донесеме одлука со којашто општините нема да плаќаат комуналии. За куќа, за брачен пар до 35 години општините нема да наплаќаат комуналии. На цела територија на Македонија“,
рече Мицкоски.
Третата мерка предвидува најмалку 20 отсто поголем обем на услуги за студентите и младите преку апликацијата „М-услуги“.
Премиерот посочи дека дека не станува збор само за зголемување на вредноста на студентскиот оброк, туку и за дополнителни услуги што студентите ќе можат да ги користат преку апликацијата.
„Целта не може да ми биде ниту мене, ниту на моите соработници во Владата различна од тоа да бидеме пријатели и на студентите и на младите луѓе. За таа цел, разработуваме, секој студент да не добие усогласување со она што се вели инфлација, трошоци за живот, зголемување на оброкот, туку да добие најмалку 20 отсто поголеми услуги, не за топлиот оброк, туку за многу други услуги што ќе ги има користејќи ја апликацијата ‘М-услуги‘“,
рече Мицкоски, додавајќи дека концептот се разработува во соработка со Генералниот секретаријат и министерствата за образование, финансии и дигитална трансформација.
Тоа, како што додаде е нешто што го немаат ниту студентите во Европската Унија, а тоа ќе го имаат студентите овде, во нашата Македонија.
„И кога ќе заврши буџетот за тој месец, да продолжат со користење на оваа апликација, да имаат дополнителни услуги кои ќе ги користат до крајот на месецот, до почетокот на следниот месец“,
вели тој.
Премиерот рече дека трите мерки ќе бидат преточени во законски решенија и најави дека очекува поддршка од сите пратеници во Собранието.
На конференцијата, одржана под мотото „Нашата генерација – нашата Македонија“, Мицкоски порача дека задржувањето на младите во земјава и враќањето на оние што заминале се меѓу најважните прашања за иднината на државата.
„Без подмладок, без млади луѓе нема иднина. Ниту политичка партија, ниту Македонија како држава. И цело време кога разговараме се обидуваме да креираме политика повеќе, мерка повеќе, за да можат младите да останат тука, а оние кои заминаа да ги вратиме назад. Тоа е за нас најголемиот проект, а тоа е Македонија земја на млади луѓе. Токму тоа е целта на овие мерки кои ќе се преточат во закони и за кои очекувам поддршка од сите пратеници во македонското собрание. Едно од најважните прашања за иднината на Македонија е токму ова за коешто зборував“,
вели Мицкоски.
На крајот од говорот на конференцијата на Унијата на млади сили на партијата, Мицкоски ги повика младите да не чекаат идеални услови, туку со сопствените идеи, труд и упорност да ја создаваат својата иднина и да придонесат за подобра Македонија.
„И запомнете, големината на една генерација не се мери според тоа колку лесно време наследила, туку според тоа колку подобро време оставила зад себе“,
посочи премиерот.
