Oбидите оваа постапка да се претстави како тајна зделка се обични политички манипулации, велат од ВМРО-ДПМНЕ
СДС и Венко Филипче се обидуваат да креираат скандал таму каде што нема, во постапката за Алта банка, која е јавна и транспарентна, обвинуваат од ВМРО-ДПМНЕ. Во соопштение од владејачката партија се наведува дека опозицијата продолжува со ширење неосновани обвинувања, обидувајќи се од редовна и транспарентна постапка за јавна аукција, во јавноста да претстават непостоечки скандал.
„Фактите, се следни. Продажбата на над 95 проценти од акциите се реализира преку Македонската берза, со јавно објавена постапка, утврдени правила и познати термини за аукциите. Првата аукција е закажана за 30 ноември, со почетна цена од 3.777 денари по акција. Сите информации се јавно достапни и секој заинтересиран граѓанин може да ги провери“,
се наведува во соопштението.

Обидите да претстави како тајна зделка се обични политички манипулации, се наведува во соопштението од ВМРО-ДПМНЕ.
„СДС и Филипче без никаква одговорност и грижа на совест, само се расфрлат со разноразни лаги и обвинувања со што се обидуваат да создадат недоверба и паника кај граѓаните. Ова е веќе препознатлив и веќе виден модел на политичко дејствување на СДС, најпрво обвинувања и драматизација, а потоа молк, никаде ги нема да се извинат кога фактите ќе ја покажат вистинската состојба. Тоа што е сигурно, ВМРО-ДПМНЕ нема да дозволи неодговорни политички конструкции да ја нарушуваат довербата во финансискиот систем. Стабилноста на банкарскиот сектор и сигурноста на граѓаните се приоритет на Владата предводена од ВМРО-ДПМНЕ и нема да дозволи, како во времето на СДС, банки да пропаѓаат и граѓаните да ги изгубат своите средства“,
додаваат од ВМРО-ДПМНЕ.
