Од ОЈО Охрид соопштија дека во текот на денот се преземени повеќе дејствија за испитување на настанот, а исказ во присуство на социјални служби дала и претепаната девојка. Издадена е наредба за вештачење на видот и карактерот на нејзините повреди
Основното јавно обвинителство (ОЈО) Охрид поднесе обвинение за три кривични дела и побара притвор за 31-годишниот охриѓанец кој ја претепа својата партнерка. Обвинението доставено до Судот во Охрид е за три кривични дела – телесна повреда, противправно лишување од слобода и загрозување на сигурноста.

„При вршење семејно насилство, обвинетиот противправно ја затворил, физички ја нападнал, телесно ја повредил и ја загрозил сигурноста на една оштетена“,
наведуваат од Обвинителството.
Оттаму додаваат дека во текот на денот Обвинителството презело повеќе дејствија за испитување на настанот, а исказ во присуство на социјални служби дала и претепаната девојка. Издадена е наредба за вештачење на видот и карактерот на повредите на девојката, а имајќи ги предвид утврдените околности во предметот, за осомничениот е доставен предлог за определување мерка притвор.
Претходно во текот на денот, на осомничениот му беа одредени мерки на претпазливост, а на барање на обвинителот од ОЈО Охрид, тој попладнево беше приведен.
