„Дигитализацијата за нас не е само софтвер. Таа е политичка алатка за правда и сурова транспарентност. Каде што има дигитален систем, нема простор за криење и тука завршува неефикасноста на системот“, вели министерот
Одговарајќи на новинарско прашање за претстојната грејна сезона, министерот Хоџа информира дека Владата на вчерашната седница усвоила краткорочен план со конкретни мерки за институциите
Министерството за животна средина и просторно планирање ја презентира новата иницијатива „Зелен пресврт низ дигитализација“, составена од пет конкретни модули. Како што истакна министерот Мухамет Хоџа на денешната прес-конференција, целта е остварување поголема транспарентност, побрзи административни услуги и ефикасно управување со еколошките податоци.
„Дигитализацијата за нас не е само софтвер. Таа е политичка алатка за правда и сурова транспарентност. Каде што има дигитален систем, нема простор за криење и тука завршува неефикасноста на системот“,
изјави министерот Хоџа.
Иницијативата, рече тој, се состои од пет посебни модули, од кои секој покрива различна клучна област.
Првиот модул „Темели“, рече дека овозможува јавен увид за граѓаните, медиумите и НВО во проектите на Министерството – нивната вредност, локација, извори на финансирање и рокови за изведба.
Модулот „Јадро“ опфаќа дигитализација на архивата за електронско следење на предметите и е во соработка со Министерството за дигитална трансформација. Хоџа рече дека веќе е завршена дигитализацијата на просторно-информативниот систем за геопросторните податоци на заштитените подрачја.
Модулот „Време“ Хоџа рече дека е административна реформа за кратење на процедурите. Првата фаза опфаќа 15 од предвидените 30 чекори за поедноставување на постапките и треба да заврши до крајот на годината.
Кај модулот „Земја“ има дигитално мапирање на дивите депонии во општините заради подобро планирање на ресурсите за нивно расчистување и подготовка за регионалните центри за отпад.
„Функционалноста на платформата ќе биде предмет на консултации со граѓанските организации, ЗЕЛС и стручната јавност, а нејзината реализација е предвидена во буџетот за 2027 година“, рече Хоџа.
Тој додаде дека паралелно, во неколку општини се спроведува пилот-проект за видеонадзор на дивите депонии.
Последниот модул во иницијативата е „Воздух“ и тој предвидува воспоставување дигитален регистар во кој 140 иматели на А-интегрирани еколошки дозволи ќе објавуваат податоци за своите емисии, согласно Законот за контрола на емисиите што стапува во сила во септември 2027 година.
Одговарајќи на новинарско прашање за претстојната грејна сезона, министерот Хоџа информира дека Владата на вчерашната седница усвоила краткорочен план со конкретни мерки за институциите.
Овој план опфаќа засилени контроли на индустриските капацитети со А-интегрирани и Б-интегрирани дозволи, како и тесна соработка со локалната самоуправа.
Во однос на долгорочните мерки, Министерството спроведува проект за замена на нееколошките системи за греење во јавните установи.
„Ќе го реализираме и проектот за промена на начинот на затоплување на институциите и во оваа фаза имаме над 70 институции кои со проект се предвидени да сменат начин на греење од нееколошко на еколошко. На 20 институции веќе се завршени, а другите се во подготвителна процедура на документацијата“, одговори Хоџа.
Тој најави дека во следниот период сите пет модули ќе бидат детално и поединечно презентирани пред јавноста.