Тој е предложен од одбраната на обвинетиот Боби Гидиоски и според неговиот адвокат треба пред судот да даде исказ за тоа дали се стекнал со противправна имотна корист, дали имал контакти и дали се познавал со обвинетиот
Обвинителката во Основното јавно обвинителство за гонење организиран криминал и корупција Спасенка Андонова, која го застапува обвинението, најави дека ќе се произнесе за секој од предлозите на одбраната на следното рочиште, кое судот го закажа за утре
Сопственикот на т.н. кабаре „Пулс“, Дејан Јованов-Деко, и неговиот син Михајло Јованов се предложени како сведоци од дел од одбраната на деветтемина полициски службеници во рамките на судскиот процес што се води против нив, а е поврзан со нивното (не)постапување во врска со објектот каде што лани во пожар загинаа 63 лица, а повеќе од 200 беа повредени.
Полициските службеници на кои им се суди во овој процес, кој се води одвоено од, условно кажано, главното судење за пожарот во „Пулс“, се обвинети дека без соодветни проверки за паркинг-места и за нарушувања на јавниот ред и мир дале согласност за т.н. кабаре да добие лиценца за работа.
Нивната одбрана на денешното рочиште ги образложуваше предлог-доказите од своите листи. Адвокатите предложија на следните рочишта да бидат изведени повеќе материјални докази, како и распит на повеќе сведоци, меѓу кои газдата на „Пулс“, Дејан Јованов-Деко. Тој е предложен од одбраната на обвинетиот Боби Гидиоски и, според неговиот адвокат, треба пред судот да даде исказ за тоа дали се стекнал со противправна имотна корист, дали имал контакти и дали се познавал со обвинетиот.
Бранителот на Гидиоски, адвокатот Бранко Колев, во изјава за медиумите по рочиштето изјави дека предложиле голем број голем број материјални докази, меѓу кои 16 документи, како и осум сведоци.
„Од материјалните докази предложивме околу 16 документи, додека од вербалните – осум сведоци, меѓу кои е и Дејан Јованов-Деко, сопственик на дискотеката „Пулс“. Го предлагаме на околности затоа што записникот на обвинението тврди дека обвинетите му дозволиле на Деко да се стекне со имотна корист која се изразува во плата која ја земал како вработен за шест месеци. Па, на таа околност бараме да биде сослушан, дали тоа му е овозможено од обвинетите“,
изјави Колев, пренесе МИА.
Адвокатот појасни дека дел од доставените документи се однесуваат на работењето на Министерството за внатрешни работи, односно на Секторот за внатрешни работи (СВР) Штип, додека други се поврзани со информација за состојбите во т.н. кабаре.
„Останатиот дел се однесува на проблемска информација која што е прикриена од обвинетиот Боби Гидиовски како началник на СВР Штип, а која проблемска информација е доставена за проблемите во дискотеката ‘Пулс’ кои ОВР Кочани ги имале во Кочани“,
рече адвокатот.
Инаку, како што објави Телма во едно од изданијата на емисијата „Код“, станува збор за проблемска информација што кочанската полиција ја испратила до СВР Штип во ноември 2022 година, а во која било наведено дека имало чести нарушувања на јавниот ред и мир и кривични дела во и надвор од т.н. кабаре за време на нејзиното работење во текот на таа посочената година.
Друг адвокат, пак, го предложи за сведок синот на газдата на „Пулс“, Мехајло Јованов, и според највата тој пред судот треба да каже во какви односи биле со неговиот клиент.
Обвинителката на Основното јавно обвинителство за гонење организиран криминал и корупција Спасенка Андонова, кој го застапува обвинението, најави дека ќе се произнесе за секој од предлозите на одбраната на следното рочиште, кое судот го закажа за утре во 12 часот.
Инаку, деветтемина полициски службеници се гонат за кривичното дело злоупотреба на службената положба и овластување. Според Обвинителството, тие не извршиле целосна и детална проверка при издавање согласност за добивање лиценца на т.н. кабаре „Пулс“ во Кочани. Имено, тие биле задолжени за проверки од аспект на јавниот ред и мир и сообраќајната безбедност, и потпишале дека т.н. кабаре ги поседува предвидените најмалку 20 паркинг-места, иако тоа не било случај.
Претходно сите деветмина пред Судот се изјаснија дека не се чувствуваат виновни за кривичното дело што им се става на товар.