Претставник на американскиот Стејт департмент вели дека идејата на прв поглед изгледа неверојатно, но додаде и дека Орбан би можел да добие поддршка од најмалку осум членки на Советот за безбедност, а потенцијално и од десет од вкупно 15 членки
Според весникот, Орбан покажал интерес за функцијата, но останал воздржан. Наводно, тој не би сакал да влезе во трката доколку нема реални изгледи за победа. Евентуалната официјална поддршка од Трамп и од потпретседателот Џеј-Ди Венс би можела да биде објавена по изборите за американскиот Конгрес на средината на претседателскиот мандат
Администрацијата на американскиот претседател Доналд Трамп го предлага поранешниот унгарски премиер Виктор Орбан за кандидат за генерален секретар на Обединетите нации, објави „Волстрит журнал“, посочувајќи дека Русија и Кина како постојани членки на Советот за безбедност на Обединетите нации, кои имаат право на вето, покажале подготвеност да го поддржат предлогот.
Според медиумот, Соединетите Американски Држави (САД) го охрабриле поранешниот унгарски премиер да влезе во трката, како и биле главни иницијатори на самата идеја. Сепак, сè уште се чека конечна одлука.
Во натписот на „Волстрит журнал“, насловен како „Виктор Орбан, генерален секретар на ОН?“, се наведува дека администрацијата на Трамп подготвила план да го претстави Орбан како кандидат кој би имал заедничка поддршка од САД, Русија и Кина.
Американски претставници, пак, сметаат дека, доколку трите земји се усогласат во Советот за безбедност на ОН, би можеле да обезбедат доволна поддршка за изборот на Орбан.
Зошто Орбан и зошто сега
Претставник на американскиот Стејт департмент вели дека идејата на прв поглед изгледа неверојатно, но додаде и дека Орбан би можел да добие поддршка од најмалку осум членки на Советот за безбедност, а потенцијално и од десет од вкупно 15 членки.
Според „Волстрит журнал“, Орбан покажал интерес за функцијата, но останал воздржан. Наводно, тој не би сакал да влезе во трката доколку нема реални изгледи за победа. Евентуалната официјална поддршка од Трамп и потпретседателот Џеј-Ди Венс би можела да биде објавена по изборите за американскиот Конгрес на средината на претседателскиот мандат.
Орбан беше премиер во два периода, од 1998 до 2002 година и од 2010 до 2026 година. На изборите во април 2026 година ја загуби власта. Американскиот претседател Доналд Трамп претходно јавно го поддржа, а потпретседателот Џеј-Ди Венс отпатува во Унгарија за да учествува во кампањата во негова поддршка.
За време на своето владеење, Орбан во повеќе наврати ги менуваше Уставот и изборните закони во корист на својата владејачка партија, ги претвори јавните радиодифузни сервиси во канали за владина пропаганда и им овозможи на провладините конгломерати да преземат над 80 отсто од главните медиуми, ставајќи ги под влијание на владата. Исто така, го зголеми бројот на судии во Уставниот суд од 11 на 15 и го реструктуира составот на комисијата за номинации, со цел да ги замени судиите со поединци блиски до режимот. Дополнително, преку законски измени, ја намали старосната граница за пензионирање на судиите во Врховниот суд, овозможувајќи именување судии кои се наклонети кон неговата партија.
Повеќе генерал отколку секретар
На крајот од текстот „Волстрит журнал“ наведува дека доколку Орбан ја преземе функцијата, би можел да се однесува повеќе како „генерал“ отколку како „секретар“ – лидер кој знае да ја користи моќта во непријателска средина и не се плаши од бирократијата на ОН.
Американски претставник, цитиран во написот, оценил дека Орбан ја има „вистинската идеологија“, знае како да дејствува во непријателски услови и нема да биде заплашен од воспоставените интереси во седиштето на Обединетите нации.
И покрај тоа, оценката на медиумот за оваа идеја е критичка. Весникот наведува дека нема илузии за моралниот авторитет на ОН, а во заклучокот ја критикува можноста Орбан да биде избран, оценувајќи дека таквиот избор би ја покажал длабочината на кризата во која се наоѓа организацијата.
Критики кон Гутереш
Републиканците во САД, особено приврзаниците на движењето МАГА, како и десничарските медиуми и тинк-тенк организации, имаат остри критики за работата на актуелниот генерален секретар на ОН, Антонио Гутереш.
Конзервативците му забележуваат на Гутереш поради неговите предупредувања за климатската криза, која ја опишува како „колективно самоубиство“, и употребата на изразот „глобално вриење“ наместо „глобално затоплување“. Според нив, ваквата реторика поттикнува претерани климатски политики што можат да ѝ наштетат на светската економија и на американската индустрија.
Тие го критикуваат и поради поддршката за политики поврзани со интеграцијата на мигрантите, родовата еднаквост и различноста, правичноста и вклученоста, кои ги сметаат за несоодветно наметнати приоритети на ОН.
Како се избира генералниот секретар на ОН
Мандатот на актуелниот генерален секретар Антонио Гутереш завршува на 31 декември. Иако мандатот на генералниот секретар трае пет години и нема ограничување за повторно именување, вообичаена практика е да се извршуваат најмногу два мандата, односно вкупно десет години.
Генералниот секретар на ОН се избира во две фази. Најпрво, Советот за безбедност треба да препорача кандидат со најмалку девет гласа од вкупно 15 членки, без вето од која било од петте постојани членки, како САД, Русија, Кина, Франција и Обединетото Кралство. Потоа, Генералното собрание, составено од 193 земји членки, го именува кандидатот.
Досега, Генералното собрание никогаш не одбило кандидат препорачан од Советот за безбедност.